SHILLONG: Jaintia Hills jolrangona rel rama tariangna miksonganiko Jaintia Students Union (JSU)-ba raken jegalataha.
Assam a·doko donggipa Chaparmukh junction-oni Meghalaya a·dokni Jowai-ona kilometer 180 ong·gipa rel ramako tarina Northeastern Railway Frontier (NFR) miksongenga ine koborrangko man·soani ja·man iako JSU-ba raken jegalataha.
Ia rel ramara, Chaparmukh junction-oni Bhoksong, Rajagaon, Baithlangso, Jengkha, Kherami aro Umrangso gita Jowai-ona tariangna miksongenggipa rama ong·engachim.
Meghalaya a·dokona niam gri napsrukanirangko champengna Inner Line Permit (ILP)-ko ra·gate on·kujaskal NFR-na no-objection certificate (NOC)-ko on·jachina JSU, Jaintia Hills Autonomous District Council (JHADC)-koba didiataha.
Rel ramarangko tarina gisik on·ana bate Jaintia Hills-o medical college, engineering college aro gipin nangchongmotgipa kamrangnan gisik on·batchina gitaba JSU, a·dok sorkario dabiangaha.
Iana skang, rel garirangko nangnikama nangnikja uade jolo songdongenggipa manderangosa ong·na nanga aro darangba iani bidingo champengna man·ja ine a·dokni Cabinet Minister Kyrmen Shylla, Jaintia Hills-ona rel gari ra·napbaaniko jegalengani gimin aganahachim.
Rel garirangko ra·baani bidingo joltangni manderangsa an·tangtangni nangnikaniko aganna bil donga aro gipin biaprangonide darangba champengna bil dongja ineba Jaintia Hills-ni MLA aro Minister Kyrmen Shylla aganahachim.
Shylla-ni parakatani gitade, Jaintia Hills a·jao songdongenggipa manderangoni bang·batan bading chiwale cha·giparang ong·a aro rel garirangko ra·baani bidingo chanchina a·jao songdongenggipa manderangnan pakwate on·na nangenga.
Rel ramarangko taribaani bidingo a·jao songdongenggipa manderang baksa chanchirimna a·bachengaha ineba Jaintia Hills-ni Cabinet Minister Kyrmen Shylla aganahachim.
