SHILLONG: Khasi aro Jaintia Hills jolrango, National People’s Party (NPP)-ko ‘Garo party’ gita ra·ani a·selsa Khasi Hills Autonomous District Council (KHADC) election-oba seat-rangko bang·e chena man·jaha ine jangbingbanganiko a·dokni Chief Minister aro NPP-ni national president Conrad K Sangma jegalataha.
KHADC election-o NPP, seat dambrikosan chena man·aiahachim ine nikna man·a.
KHADC aro JHADC election result-rangni gimin janapatengon, batanggimin chang MP election-ona batede ia MDC election-o uamang party-ni gita nambate dakna ka·dongachim ine Sangma aganaha.
MP election-ode NPP, Khasi-Jaintia Hills jolni bang·bata constituency-rangon amako man·aha indiba ia chang MDC election-ode vote man·ani nambataha ineba NPP president aganaha.
“Election-o chu·sokgipa ong·na chinga rakbate kamrangko ka·na nangenga,” ine ua aganaha.
Voice of the People’s Party (VPP)-ni tang·dobaroroenganiara NPP-na ka·mikkenatani gita ong·engama ine sing·anina aganchakaniko on·angengon, NPP-de darang party-rangkoba nom·e ra·gipa ong·ja aro darangkoba mikchepgipa ong·ja indiba ia chang MDC election-o VPP-ni vote man·ani komibataha ine Sangma a·kangataha.
Khasi Hills jolrango NPP-ko ‘Garo party’ dake ra·ani a·sel amako man·engama ine sing·skaon, ian politics-ni gita agananisan ong·aia ine Sangma jegalatskaaha.
“NPP-ko ‘Garo party’ ine manderang chanchibebegenchimode chinga Jaintia Hills-o indita seat-rangkon chejawachim aro KHADC-oba seat dambrikon chejawachim,” ine Sangma aganaha.
KHADC aro JHADC election-ni result-rangde re·baenggipa bilsio ong·atna sienggipa Garo Hills Autonomous District Council (GHADC) election-na maming nangchakeanirang dongjawa ineba NPP president a·kangataha.
KHADC-o VPP-chi dilenggipa Executive Committee (EC), pilak scheme aro project-rangkon jegalnaba gnang ine kenchaksoenggipani gimin sing·on, pilak poltical dolrangan manderangnasa dangdike on·enga aro pilak dolrangan namgninasa kamko ka·gen ine a·dokni Chief Minister, an·tangni ka·dongchakenganiko parakataha.
