SHILLONG: Batanggimin KHADC aroba JHADC election-rango chu·sokna man·rikjani gimin, Congress party da·o an·pachakgipa gadangoni uchi unit level-ona kingking uamangni organization-ko bilakattaina gita re·chakatgen.
Party-ko bilakatna gita da·omiting maming cholrang dongjani a·sel, party-na an·pachake kam ka·gipa organization-rang bilgria, uni a·selsa re·anggipa MDC election-rango Congress party chu·sokna man·rikjaha ine Congress dilgipa Deborah Marak a·kange aganaha.
“Chinga da·onin party-na an·pachake kam ka·giparangko ba dolrangko bilakattaina ja·ku de·gen aro party worker-rangko tangchaatpilgen,” Marak aganaha.
Batanggimin ADC election-ni somoio KHADC-o ge·sa seat-koba cherikjani bidingo, Congress dilgipa ia kattarangko aganaha, indakoba JHADC-ode ge·gittam seat-rangode chrikpaaha.
Congress party, jean changsao a·dokko sason ka·achim, da·o namen bilgriroroangaha, jeon da·ode uamango MLA saksa, MP saksa aro Jaintia Hills-o sakgittam MDC-rangsan dongaiaha.
Unomitingo VPP-na nama skaniko on·nan baksa, da·oni gital party uamangni ku·rachakaniko aro manderangni nangnikaniko chu·sokatgen ine ka·donganikoba Marak parakaha.
