SHILLONG: 2023 bilsini Assembly election-oni a·bachenge ia bilsi ong·atanggipa District Council election-ona kingking changgittamna election-ko ong·atanion a·dokni Congress dol chu·sokgipa ong·jahani gimin Congress dolni ning·o, dilgipako dingtangatchina nangnikanirang batroroengaha aro mitam membor-rangde iani bidingo nipiltaichina gitaba dabitokskaengaha.
“Chu·sokgipa ong·jaengani gimin jegalgiparang aro suk ong·nikgijagiparangde donga beben indiba Congress dolni ning·o iandake ong·engade ong·ja. Mitam membor-rang, election-ni result-rang namjaengani gimin suk ong·tokjaenga indiba gimikande ong·ja maina state president-ko kamo ra·kuchina nangnikgipa membor-rangba donga,” ine Bristibar salo, Congress doloni kobor on·timgiparang parakataha.
Kobor on·timgiparangni parakatani gitade, mitam membor-rangsa iani bidingo jegaltokenga indiba iani bidingo party-ni gitade chanchirimaba dongkujaengachim.
“Dilgiparangko dingtangatanide mongsonggipa bak ong·jaenga indiba batanggimin changgittamna ong·atanggipa election-o maini a·sel chu·sokgipa ong·jaha, ukosa nipilna nangenga. Chingni vote man·anirang batangengama komiangenga, badia district-o chinga amenga aro amjaenga, ukosa nina nangenga,” ine Congress doloni kobor on·timgiparang parakataha.
Election-o chu·sokgipa ong·jaengani gimin nipilchina gita dabianirang bang·en donga ine janapatskaengon, “Batanggimin bilsirango chingni vote man·ani mai rokom ukoba name nipilna nangenga indiba dilgipako dingtangatna nanganide ong·jaengachim,” ine kobor on·timgiparang aganaha.
Iani bidingo uamang bakan tom·aniko ong·atgen aro pilak membor-rangni agan-ku·pattianirangko ra·gen ineba Congress membor aganaha.
