TURA: Garo Hills Autonomous District Council (GHADC)-o A·chik ong·gijagipa gipin jatrangni pu·onaniko aro election-rango susaaniko champengna gita dingtangmancha niamko ra·gatchina Garo Hills-ni A·chik Progressive Approach (APA) dol, GHADC-ni dilgiparangko didiangaha.
Iani bidingo Rule 8 aro Rule 128-ko taridapna gita APA-ni membor-rang, dingtangmancha GHADC-ni Chief Executive Membor (CEM) Albinush R Marak aro Deputy CEM Nikman Ch Marak-naba memorandum-ko on·angaha.
Ia niamrangara da·o namen gitchambeaha ine janapatengon, ia niamrangko da·o mikkang jao ong·atna sienggipa GHADC-ni budget session-o taridapchina APA didiangaha.
GHADC-ni CEM aro Deputy CEM-ko grongeani gimin janapatengon, GHADC-ni dilgiparang, uamangni dabianiko niatna ku·rachakaniko on·ataha ine APA-ni dilgiparang parakataha.
APA-ni parakatani gitade, ia niamrangko da·o ong·atna sienggipa budget session-ode taridapna man·janaba gnang indiba iani bidingo GHADC-ni special session-ko ong·atskana man·gen ineba GHADC-ni dilgiparang, uamangna ku·rachakaniko on·ataha.
Da·o dipet GHADC-o A·chik ong·gijagipa MDC-rangba dongkuengachim ine nikna man·a.
