SHILLONG: Assam-oni Mendipathar-ona tarianggipa rel ramako South Garo Hills a·jani headquarter Baghmara-onaba tariangchina gita South Garo Hills a·jani MLA-rang, a·dokni Chief Minister Conrad K Sangma-ko didina manchie donangaha.
Iani bidingo kobor ra·timgiparangna u·iatengon, “Anga, South Garo Hills-ni gipin MLA-rang baksa a·dokni Chief Minister Conrad K Sangma-ko grongenba, Guwahati-oni Mendipathar-ona tarianggipa rel ramako Baghmara-ona aro Dhaka-onaba tariangchina didie, memorandum-ko on·anggen,” ine Sombar salo, a·dokni Education Minister aro Rongara-Siju-ni MLA Rakkam A Sangma parakataha.
“A·songni jakgitelko man·na skangan South Garo Hills a·jao bading chiwalanirang chu·sokgipa ong·aniko nikna man·ahani gimin Baghmara-ona aro Dhaka-ona rel ramarangko tarianggenchimode ian bading chiwalanio mongsonggipa rama gita ong·gen,” ineba ua aganaha.
Ramarang namani giminsa America-ba man·e cha·gipa a·song ong·enga ine janapatengon, “Namroro silroroaniko ra·bana gitade rama jal·langrangko nangchongmota,” ine Education Minister parakataha.
“Uni gimin Baghmara-ona aro Dhaka-onaba rel ramarangko tariangna gita ma·mong sorkari baksa agangrikchina chinga Chief Minister-ko mol·molgen,” ine Sangma aganaha.
Indake ong·genchimoba rel garirangko ra·baanio niam gri re·napbana jotton ka·gipa manderangko name nirokna man·na gita dingtang dingtang biaprango integrated check point-rangko songna nangani gimin Education Minister janapatskaaha.