TURA: South Garo Hills a·jaoba Tribal ong·gijagipa manderang jelrorobaengahani gimin Nongalbibra-oni GOERA minggipa dolsa, an·tangtangni jajrengchakaniko parakatenba, iani bidingo ta·raken am·sandianirangko dakchina, South Garo Hills a·jani Superintendent of Police (SP)-ko didiataha.
GOERA dolni parakatani gitade, South Garo Hills a·jani Nongalbibra jolrangona an·tangtangko bading chiwale cha·enggipa mande ine gipin jatrang re·baroroengani a·selan da·o ia jolrango gipin jatrang jelrorobaengaha aro ian ia jolrango songdongenggipa Tribal-rangna, mongsongbate A·chikrangna kenchakna nangani ong·engaha.
“Ia jolrangona re·bae songdongenggipa gipin jatrang, jolni Tribal me·chikrangko kal·akna aro dingtang dingtang ong·gija kamrangko ka·na cholrangko ra·enga ine chinga nikna man·enga. Batanggimin somoirango mande gimaani, jolo bia ka·e dongenggipa me·chikrangko bading chiwale cha·enggipa gipin jatrangni seke katanirangko aro uandakgipa ong·gija kamrangko nikna man·engani giminsa da·alo ching ia jolrango songdongenggipa gipin jatrangko name am·sandichina didiatenga,” ine GOERA-ni dilgiparang, South Garo Hills-ni SP-na sedoatgipa chittio janapataha.
Ia jolrango kam ka·e cha·enggipa gipin jatrangara joltangni manderanganma ma gipin biaprangoni niam gri re·bae songdongenggiparangsama uko ma·sina gita licence-rangko, nangchongmota lekkarangko aro bading chiwalani kamrangko am·sandichina gitaba GOERA dol, South Garo Hills a·jani SP-ko didiataha.
“Iandake gipin biaprangoni re·napbaenggipa gipin jatrangko am·sandianirang dongjaengani a·selan jolo songdongkamgipa Tribal me·chikrang baksa ong·gija dakanirang batroroenganiko nikna man·enga. Uni gimin ia jolrango songdongenggipa Tribal-rangni naljokgnina aro namgnina ta·raken ja·kurangko de·china chinga mol·molenga,” ine GOERA parakataha.
