SHILLONG: Meghalaya Energy Corporation Limited (MeECL)-ni ning·o bijoli jakkale gro gamchipjani gimin rattonggalako man·gipa nokdangrangna a·dok sorkari, dingtangmancha One Time Settlement (OTS) Scheme-ko a·bachengataha.
Ia OTS scheme-ko Mongolbar salo, a·dokni Chief Minister Conrad K Sangma aro Power Minister AT Mondal a·bachengate on·angaha.
Ia OTS scheme-ni bidingo a·dokni Chief Minister, talataniko on·angengon, ia OTS Scheme 2025-ara, 5 KW aro una komibatgipa bijoliko jakkale, gro gamchipjani gimin rattonggalako man·gipa ‘Domestic Low Tension (DLT) aro ‘Kutir Jyoti/BPL’ nokdangrangna ra·gate on·enggipa scheme ong·a aro ia scheme-ko ru·uta somoirangoni gamchipgija dongenggipa grorangko man·pilna sorkari a·bachengataha ine parakataha.
Ia scheme-ko a·bachengatanichi bijoli jakkalenggipa manderangoni sak 45,000-mangni gita namgnirangko man·gen aro gong kror 26-na baten dairangko watgen ineba Chief Minister parakataha.
Ia scheme-ni ning·o bijoli jakkale gro donggipa manderang, 40 percent principal amount-ko gamna nanggen aro bangki 60 percent-kode sud gri changbonga dake gamna cholko man·gen ineba Chief Minister aganaha.
Ia OTS scheme-ko March 1 tarikoni March 31 tarikona on·anggen aro bijoli rattonggala man·gipa nokdangrangsan, ia scheme-na dorgastoko gale namgnirangko ra·na man·gen ineba ua aganaha.
Sorkarini on·enggipa cholko ra·china gro donggipa manderangko didiatengon, ian bijolini grorangko gamchipgija dongenggipa manderangni balko ritchengatna sorkarini on·enggipa chol ong·enga ine Chief Minister parakataha.
Chief Minister-ni parakatani gitade, da·o dipet bijoli jakkalenggipa manderangoniko man·na nangkuenggipa grorang gong kror 119 ong·engahachim.
