TURA: Tura-ko Winter Capital songaniara Meghalaya a·dokni skanggipa Chief Minister Captain Williamson A Sangma-ni nikjumangani aro nangnikanian ong·achim ine A·chik Holistic Awakening Movement (AHAM) parakatenba, uni nangnikaniko chu·sokatchina a·dokni Chief Minister Conrad K Sangma-na sedoataha.
Chief Minister-na sedoatgipa chittio AHAM-ni parakatani gitade, Meghalaya a·dokko 1972 bilsio songchengani somoion, a·doko songdongenggipa pilak jatrangnan apsan dake namroro silroroaniko on·na a·dokni skanggipa Chief Minister Capt WA Sangma sagi, Tura-ko Winter Capital songna tik ka·ahachim.
“Garo Hills-oba pilakni gitan namroro silroroaniko man·china a·dokni skanggipa Chief Minister Capt Sangma, Tura-ko Winter Capital songna tik ka·ahachim. Bilsiantian jadokna Tura-ko Winter ba Second Capital songanichi Garo Hills-oba namroro silroroaniko ra·bana Capt Sangma-ni nangnikaniko chu·sokatani ong·gen,” ine AHAM-ni president Georgeprince Ch Momin parakataha.
Tura-ko Winter Capital songna nangengani gimin a·selrangko janapatengon, bilsi 50 batpilahaoba Garo Hills-o ja·manchakaniko nikna man·engani gimin a·dokni pilak biaprangnan apsan bak rengsiko on·na man·na gita Tura-ko Winter Capital songna nangchongmota ine AHAM didiataha.
“Sorkarini executive, legislative aro judicial bakgittamkon jadokna Tura-o donanichi Garo Hills-o songdongenggipa manderangni nanganirangko chu·sokatna man·gen,” ine AHAM parakataha.
Assam a·dokni Dibrugarh-ko Second Capital ine Assam Chief Minister Himanta Biswa Sarma-ni adita salrangna parakatgipani bidingo janapatengon, ian Assam-o sorkarini kamrangko pilak biaprangona gipatani gita ong·enga ine AHAM-ni president parakataha.