RESUBELPARA: North Garo Hills a·jao District Selection Committee (DSC)-ni gita LDA-cum-Typist-ni kamna kam ka·giparangko seokani bidingo talataniko on·china Rongrong MDC Rinaldo K Sangma, North Garo Hills a·jani Deputy Commissioner-na sedoataha.
North Garo Hills a·jao LDA-ni kamna adita somoirangna skangan porikkako seatahachim indiba da·alonan interview-ni result-rangko parakkujaengani gimin Rongrong MDC, iani bidingo sing·doataha.
“Ia porikkao, a·dokni gipin a·jarango dingtang dingtang porikkarangna jakkalgipa Optical Mark Recognition (OMR) system-ko jakkalgija question paper-rangosa answer-rangko seataha. Una agreba dingtang dingtang kamrangna seatgipa porikkani result-rangkoba North Garo Hills-ni DSC parakkujaenga,” ine Sangma, Deputy Commissioner-na badi ka·e sedoatgipa chittio janapataha.
Sangma-ni parakatani gitade, ia porikkako ong·atna skangan, ia porikko maming dongnuani gri ong·atchina ua Deputy Commissioner-ko didiatahachim.
“Angni jajrengchakanide Resubelpara MLA-ni degipako DSC-ni vice chairman songahani gimin mikkang niteanirang aro porikkako kal·akanirang dongnaba gnang ine ong·enga. Gipin a·jarango OMR system-ko jakkale kamna seokengon maini gimin North Garo Hills a·jao OMR system-ko jakkalgija question paper-rangosa answer-rangko seatna nangaha?” ine Sangma sing·doataha.
North Garo Hills a·jani manderang, nama bewalo kamna seokaniko man·na nanga aro ainni gita ja·ku de·aniko am·naba bil donga ine janapatskaengon, North Garo Hills a·jaan kamna ra·aniko a·bachengatgipa ong·ahaoba maini gimin gipin a·jarang result-rangko parakpilahaoba da·onan North Garo Hills a·jao result-rangko parakskakujaenga ine Rongrong MDC sing·doataha.
