BAGHMARA: South Garo Hills a·jao job card-chi kam ka·e cha·enggipa manderang, an·tangtangni man·na nangkuenggipa hajirarangko man·tokkujaenga ine South Garo Hills a·jani social activist Greneth M Sangma parakatenba, ia hajirarangko ta·raken on·china, South Garo Hills a·jani Deputy Commissioner-na sedoataha.
Baghmara, Chokpot, Gasuapara aro Rongara-Siju block-rango Aadhar card donggijagipa manderangnaba gital work order-rangko on·china gitaba Sangma didiataha.
“Ia block-rango MGNREGA-ni kamrangko ka·e cha·enggipa manderang, Aadhar card-rang dongjani a·sel kamrangko ka·e cha·pana cholrangko man·tokjaengaha indiba Sixth Schedule a·jarangkode Aadhar-oniko watani gimin ia manderangnaba Aadhar card grian kamrangko ka·e cha·na cholko on·piltaichina anga mol·molenga. Job Card-ni namgnirangko man·na gita Aadhar-ko nangchongmota ong·ja ine Supreme Court-an raiko on·manahani gimin South Garo Hills a·jani manderangba job card-ni kamrangko ka·e cha·na cholrangko man·pana nanga,” ine Sangma, South Garo Hills a·jani Deputy Commissioner-na sedoatgipa chittio janapataha.
2022-2023 aro 2023-2024 bilsirangonin South Garo Hills a·jao job card-chi kam ka·e cha·enggipa manderang an·tangtangni hajirarangko man·tokkujaengani gimin ia hajirarangko ta·raken on·na nanga ineba Sangma didiataha.