TURA: Babadam jolni Chidekgre-o rikenggipa Tribal Research Institute (TRI)-ko matchotgija galchipenga ine A·chik Holistic Awakening Movement (AHAM) matnangatenba, iani bidingo a·dok sorkariko sing·doataha.
AHAM-ni president Georgeprince Momin-ni parakatani gitade, ia Tribal Research Institute-ara Tribal-rangni bidingo research dakna, jatni daka rikanirangko ripingna aro niamrangko namdapate tarina kulienggipa institute ong·ani gimin ian Tribal-rangna aro mongsongbate A·chik jatna namgni ong·genchim indiba ia institute-ko matchotgija donchipaniara sorkarini kamo gisik nanggijaniko mesokani ong·enga.
“Ia project-ko a·dokni Chief Minister Conrad K Sangma 2019 parakatchengaha aro ia project-na Union Tribal Affairs Ministry, a·bachengo kror 48-ko chamatenba gong kror 41-kode chame on·atahachim. Ia project-ni bidingo parakataoni jagnini gisepon ia institute-ko rikani kamrang a·bachengani ong·achim aro uandaken 2020 bilsini November jaode skanggipa bakni tender kamrang matchotahachim. Ia institute-ko 2021 bilsini July jaode rikna a·bachengaha indiba da·o bilsibri ja·man ia project-ko matchotgija galchipe donaiengaha aro iani bidingo sorkarioni maming talatanirangba dongkujaenga,” ine AHAM-ni president parakataha.
AHAM-ni parakatani gitade, ia institute-ko rikanio museum-kosan matchotengkua, hostel-rangkode bilsi gittam ong·pilengahaoba matchotgija galchipe donenga aro mongsonggipa academic building-kode a·bachengsrangkujaenga.
Garo Hills-o ia Tribal Research Institute-ko kulianiara, jatni daka rikanirangko see rakkina gita PA Sangma sagini niksamsoaniko chu·sokatanisa ong·achim ine janapatengon, “Maini gimin ia institute-ko da·o rika matchotgija galchipenga aro iani tangka paisarangara mai ong·aha? Ia nokko rikanio contractor tangka paisarangko jakkalsretama aro iarangni bidingo a·dok sorkari maming ja·kurangko de·kujaengama?” ine AHAM-ni president sing·doataha.