SHILLONG: A·doko cyber gita cha·boke cha·anirangko warachakna aro dosi dakgiparangko rim·na gita dingtang dingtang cholrangko ra·gataha ine Meghalaya Sorkari a·kange aganaha.
Butbar salo Budget Session-o chanchirimanio sing·anirangna aganchakengon, a·doko cyber gita cha·boke cha·anirangko warachakna aro dos dakgiparangko sandie rim·na gita Superintendent of Police (Cyber Crime)-ni post-ko a·bachengataha, Meghalaya a·dokna dingtangmancha Cyber Crime Police Station-ko songaha aroba nangmitingo rang·gitik dakchakaniko on·na gita 24/7 Cyber Crime Helpline (1930)-ko a·bachengataha ine Deputy Chief Minister in-charge Home (Police) Prestone Tynsong aganchakaha.
A·doko Cyber Crime case-rangko ba cyber gita cha·boke cha·anirangko sandianiko dakenga aro Information Technology Act, 2000 aro The Bharatiya Nyaya Sanhita, 2023-ko man·chape Acts of Parliament-o ga·chate bichal ka·anirangko dakenga ineba Dy CM u·iataha.
Tynsong indakeba House-o talatangaha je, cyber gita manderangko cha·boke cha·ani bidingo mikrakatanirangko on·anirangko, mongsongbate songdamrango dakatenga aro a·dokni songadam-nokadamrango iani bidingo awareness programrangkoba ong·atjringenga.
