SHILLONG: Meghalaya a·dokni Police department-o bangbang ong·e dongenggipa ge 3000 kamrangna seokaniko ia bilsini June ja bon·angachibara matchotgnok ine a·dokni Deputy Chief Minister aro Home (Police) Minister Prestone Tynsong parakataha.
Police department-o bangbang ong·e dongenggipa kamrangko ta·raken gapatchina gita Bristibar salo, Opposition dolni dilgipa Mukul Sangma, sorkariko didiangani ja·man a·dokni Deputy Chief Minister Prestone Tynsong, iani bidingo ku·rachakaniko on·angaha.
“Ia bilsini June bon·anganichibara police department-o bangbang ong·e dongenggipa kamrangko chinga gapatna man·gnok ine anga ku·rachakaniko on·enga,” ine Tynsong aganaha.
Police department-o kam ka·giparang chu·ongjaengani a·sel dingtang dingtang kamrangko ka·anio neng·nikanirangko chagrongna nangengani gimin bangbang ong·e dongenggipa kamrangko ta·raken gapatchina gita sorkari, recruitment board-na ge·etaniko on·manaha ineba ua aganaha.
Police department-o kam ka·giparang chu·ongjaengani a·selan Meghalaya Residents Safety & Security Act (MRSSA)-ko ra·gatanioba neng·nikanirangko chagrongna nangenga ineba Tynsong aganaha.
“Chingo kam ka·giparang chu·ongjaengani a·sel ia Act-o dongimin gita kamrangko ka·na man·jaenga. Uni gimin kamo ra·aniko matchotahaode chinga police station aro outpost ge·antion sipai dolrangko bilakbatatgnok.
Deputy Chief Minister-ni aganani gitade, police department-o kam ka·giparang chu·ongjaengani a·selan dingtang dingtang case-rangko sandirokanio aro chargesheet ka·anioba nangchakeaniko man·na nangenga.
“Indake ong·genchimoba chinga department-ni gita sandirokanirangko aro charge sheet ka·anirangko man·a dipet ta·raken matchotatna jotton ka·enga aro chinga iani bidingo agangrikaha. A·dokni DGP an·tangan iandakgipa case-rangko ta·rake matchotatna daitoko jako ra·enga,” ine Tynsong aganaha.
Police-rangna dongchakani nokrangko on·ani bidingo talate on·angengon, re·baenggipa bilsirangode da·o dakenggipa Police complex-ko Khyndailad-oniko New Shillong Township-ona apjitangskana department tik ka·aha aro iana a·arangko ra·na gita Urban Affairs department, kamrangko ka·engaha ine Tynsong parakataha.
