SHILLONG: Meghalaya a·doko chri goe joa kal·ani ba Teer-ni niam, chong·motan Meghalaya Regulation of the Games of Arrow Shooting & the Sale of Teer Tickets (MRGAS&STT) Act 2018-ko a·doko name ja·rikjaenga ine Comptroller & Auditor General (CAG)-ni am·sandianio nikna man·aha.
Ia teer kal·anio, manderangni kal·gipa nombor nagenchimode gongpraknan gong 80 ka·e tangkako man·achim ine nikna man·a.
Meghalaya a·doko ia teer kal·aniko niam gita kal·atna a·dok sorkari, MRGAS&STT Act 2018-ko ra·gatahachim aro iani bidingo CAG, 2017 bilsini July 1 tarikoni 2022 bilsini March 31 tarikona sandirokanirangko dakon, ia niamko name ja·rikjaenga ine ma·sina man·aha.
Ia teer kal·ani bidingo CAG-ni gita am·sandion, sak 65 teer nokgiparangni licence-rangko renew ka·anio ja·manchakahaoba ERTS department-ni gita maming dairangko ra·jahani a·sel gong lak 24.95 kajinarangko gamchipjaha ine ma·sina man·aha.
Joint Physical Verification (JPV)-koba dakon, teer ticket-rangko palanioba niamrangko ja·rikjaha ine ma·sina man·aha.
Official-rangni u·iatani gitade, 2019 bilsini March jaoni 2022 bilsini March jaona kingking licence donggija teer counter-ko chalaienggipa sak 101 manderangna king 1,375 teer lekkarangko on·aha ine ma·sina man·aha aro ian MRGAS&STT Act 2018-ko pe·anisan ong·aigija bang·a manderangni niam gri teer counter chalaianikoba mesokani ong·aha.
MRGAS&STT Act 2018 (Amended 2019)-ni Section 6(1)-o dongimin niam gitade, teer counter-rang, olakkiram aro skul-college-rangoni komibeoba metre 100 chel·grikna nangachim indiba bang·bata biaprangon ia niamko ja·rikjaenga ineba CAG-ni am·sandianio nikna man·aha.
