Meghalaya: Meghalaya-ni South Garo Hills (SHG) district, East Khasi Hills aro East Jaintia Hills district-rangni sima arirangoniko sak 7 Bangladesh a·songoni aro sakgni India a·songni manderangko Meghalaya Border Security Force (BSF) dolni mikrake donganio rim·na man·a.
East Jaintia Hills-ni sima arirango 172 Bn BSF dol dingtangmancha am·sandianiko dakanichi Bangladesh a·songni sak 4 manderangko rim·na man·aha. Ia manderang uamangni barimarang jemangan a·songo songdongmangiparang ong·achim uamangona manianio bak ra·na India-ona napbana jotton ka·engachim. Rim·a man·gipa mande gimikan Bangladesh a·songoni ong·a ine rim·aha.
Minggipin mamala, South Garo Hills international sima ario sakgittam Bangladesh a·songni manderangko 22 Bn BSF dol rim·aha, jeon uamang kam ka·e cha·na India-ona napbana jotton ka·engachim. Sima ario maming niamgri napdrabana jotton ka·aoniko champengsona aro chu·gimik nirikianio chu·sokgipa ja·ku de·gipa ong·aha.
East Khasi Hills district-ni Nayabazar-Pynursla-o international sima ari sepang jolo garirango chini gatan baksa India-ni sakgni manderangko 04 Bn BSF dol rim·aha. Rim·a man·gipa manderang Bangladesh a·songona badingsrukatna jotton ka·engachim.
Rim·gipa garirangko aro manderangko niamni gita am·sandianiko dakdapangna nangchongmotgipa authority-rangni jako pakwate on·angaha. Sima arirango niamgri kam ka·enggiparangko champengna aro a·songni sima arirangko naljokatna Meghalaya-ni BSF Meghalaya on·kange kam ka·angkuenga. Indo-Bangladesh srima ari baksa naljjokaniko man·a on·kanga aro neng·takgija nirikianiko dakangenga.
