SHILLONG: Karnataka a·dokni Malavalli-o donggipa residential skulo bisi cha·manenba Meghalaya a·dokni chatro sakgipin siangdapaha aro uandaken ia a·sel ong·anio chadamberangni siani da·o dipet sakgni gapengaha.
Ia a·sel ong·ani, Karnataka a·dokni Mandya a·jao donggipa T Kagepura songni Gokul Educational Institution-o ong·aha aro Robibar salosan class VII-o poraienggipa a·dokni chatro Khrehlang Khongtani siangahachim.
Ia hostel-o Meghalaya a·dokoni gimik sak 23 chatrorang dongengachim aro uamangna Holi manianio tarigipa cha·anirangko on·ani ja·man, uamang gimikan saaniko man·tokahachim.
Indake ong·genchimoba uamangoni bilsi 13 ong·gipa chatro Kerlang-de Robibar salo gitilgropahani gimin uko bakan Mandya Institute of Medical Sciences-ona ra·angaha indiba hospital-o uko siaha ine doctor-rang parakataha.
Ia chatroni siangani ja·man, saaniko man·gipa gipin chatrorangoni sakgipin chatroba Mongolbar salo siangaha ine kobor on·aha.
Ia a·selni bidingo ning·tubate am·sandianirangko dakchina aro report-ko on·na gita Meghalaya sorkari, a·dokni official-rangko Karnataka-ona watataha.
Sianggipa chadambe sakgnini nokdangrangna Meghalaya sorkari, gong lak 3 ka·e compensation-ko on·gen ineba parakataha.
Ia a·selni bidingo a·dokni Health Minister Ampareen Lyngdoh, an·tangni suk ong·gijaniko parakatengon, a·dokni official-rang, ia a·selni bidingo talbate ma·sie ra·na gita Karnataka-ona sokangaha ine parakataha.
Iandakgipa institute-rangona watatna skang, ma·a paarang name ma·sie ra·chengna man·ode nambata ineba Lyngdoh aganaha.
Gipin biaprangona poraina watatenggipa chatro chatrirangna a·dok sorkari, dingtangmancha niamrangko ra·gatgen ineba a·dokni Health Minister parakataha.