SHILLONG: Sombar walo, West Jaintia Hills a·jani ning·o donggipa Sahsniang-B songo, nok te·sako wa·al kamanio, bilsi 4 ong·gipa me·chik bi·sa saksakoba bon·pile kamchapaha.
Koborko on·ani gitade, ia a·sel ong·ani Sombar walni 9:00 bajimango ong·aha aro ua somoio wa·al kamako man·gipa me·chik bi·sa Elisha Iakai, bilsi 10 ong·gipa uni abitang Glorify Iakai baksa Assam-Type noko tusiengachim.
Nokko wa·al kamengmiting somoio abigipade kate jokna man·aha indiba nogipade rasong gribee wa·al kamako man·e janggitangko gimaatna nangaha.
Wa·al kamani bidingo koborko man·soa bakan Raliang-oni Fire Brigade aro police-rang, ua biapona re·angahachim indiba uamang sokangna skangan ia nokko bon·pile wa·al kamsoaha.
Da·o dipet wa·al kamani a·selko name ma·sikujaenga indiba police-rang am·sandina a·bachengataha ine official-rang u·iataha.
