TURA: Phulbari-oni Chibragre-ona Selsella gita National Highway (NH-127B) ramako taribaengani a·sel Selsella-o gital rikmangipa Indoor Sports Hall-na nangchakeaniko ra·banaba gnang ine Selsella-o dingtang dingtang dolrangni nangrime bikotgipa All Selsella NGOs Alliance (ASNA), kenchakaniko parakatenba, ia ramako tarina skang ia Indoor Sports Hall-na nangchakeanirang dongama dongjawa uko name nipilchengahama ine West Garo Hills a·jani Deputy Commissioner-ko sing·doataha.
“Ia Selsella Indoor Sports Hall-ara ru·uta bilsirangonin jolo songdongenggipa chadamberangni ka·oksie nisenggipasa ong·ani gimin jolni manderangna, mongsongbate chadamberangna namen gamchatbegipa gam gita ong·a. Da·o ia sports hall-ko rikanirang matchotahani gimin kulie on·anikosa chinga senge dongtokenga. Indake ong·genchimoba da·o Selsella gita NH-127B ramako tariangengani gimin ian ia gital Indoor Sports Hall-na nangchakeanirangko ra·banaba gnang ine chingni gisepo kenchakanirang ong·katenga,” ine ASNA-ni dilgiparang parakataha.
NH ramarangko tarianiara jolni namroro silroroanina namen nangchongmotgipa ong·a ine janapatengon, “Iandakgipa ramarangni gamchataniko chinga ma·siengoba ia ramako tarianichi Indoor Sports Hall-ko nosto ka·skagenchimode ian Selsella jolni chadamberangna aro kal·susaanio gisik nanggipa manderangna dal·bea gimaani ong·gnok,” ine ASNA parakataha.
Indake ong·engon, Selsella gita NH-127B ramako tarina skang Indoor Sports Hall-na nangchakeani dongama dongjawa uko name nichengama nichengja, uani bidingo talataniko on·china, rama tarianichi Indoor Sports Hall-na nangchakeaniko ra·bagenchimode ia sports hall-ko chel·chakna mai ja·kurangko de·enga, aro ia ramako tarianichi Selsella Indoor Sports Hall nosto ka·ako man·genchimode, gital Indoor Sports Hall-ko rike on·gen ine ku·rachakaniko on·china gita Selsella-ni NGO-rang, West Garo Hills a·jani Deputy Commissioner-o dabiangaha.
