BAGHMARA: South Garo Hills a·jani Siju jolrango mortuary van ba manggisi salgipa garirang dongjae songni nokni manderang, mande siani somoirango manggisirangko salanio neng·nikanirangko chagrongna nangtokenga ine Federation of Khasi Jaintia & Garo People (FKJGP) Siju circle parakatenba, Siju jolni manderangna mortuary van bolsako on·china a·dokni Cabinet Minister aro Siju-Rongara MLA Rakkam A Sangma-ko didiataha.
Iani bidingo FKJGP Siju circle-ni dilgiparang, Budbar salo, Minister-ko grongenba, memorandum-ko on·angaha.
FKJGP Siju circle-ni president Saljong D Sangma-ni parakatani gitade, Siju jolrango mortuary van-rang dongkujaengani a·sel songni nokni manderang, mongsongbate gari gora dongpagijagipa manderang, mande siani somoirango manggisirangko salanio neng·nikanirangko chagrongna nangtokenga.
“Siju jolrango mortuary van-rang dongjani a·selo bang·bata nokdangrangan, nokdangni mande sina bon·na nangjokode manggisiko salna garirang dongjae neng·nikanirangko chagrongna nangtokenga. Uni gimin duko ga·akenggipa nokdangni manderangna dakchakanirangko on·na man·na gita Siju jolna mortuary van bolsako on·china chinga mol·molenga,” ine FKJGP Siju circle-ni president, Siju-Rongara-ni MLA Rakkam A Sangma-na sedoatgipa chittio janapataha.
