TURA: Gari aro a·ani lekkarangko cha·uani gimin saksa Suchorita Marak minggipa mandeni kosako FIR ka·aniko register ka·na Rongram police station-ni officer saksa tangka dabiaha ine Rongram-ni Jitherson Sangma minggipa mande matnangataha.
Jitherson Sangma-ni parakatani gitade, uni gari aro a·ani lekkarangko cha·uani gimin ua 2024 bilsini November 16 tariko FIR ka·aha aro uni FIR-ko police-rang November 19 tariko man·soahachim.
“Da·alona kingkingan police-rang angni FIR-ko register ka·kuja aro iani bidingo sandirokanikoba matchotkujaenga. Suchorita Marak, angni gari aro a·ani lekkarangko cha·uani giminsa anga FIR ka·ahachim indiba dos dakgipa mandeko sasti on·na aro angni gam-jinrangko man·pile on·na police-rang maming ja·kurangko de·jaenga,” ine Jitherson Sangma aganaha.
Ia mandeni aganani gitade, uni FIR-ko register ka·na gita re·anggipa November-ni 15 tariko saksa Benzer R Marak minggipa police officer, uoniko gong lak 3 tangkarangko dabiaha aro ua somoio social activist Flaming B Marak aro sakgipin Jill G Momin-ba ua biapo unbaksa dongpaachim.
“Angni FIR-ko register ka·na tangka on·aniara niamni a·palo ong·a aro ango tangkaba dongjani gimin anga una tangkako on·na jechakaha. Anga una tangka on·na ong·ode ua angni changgni dake FIR ka·aniko register ka·na aro cha·ugipa Suchorita-ni kosako rakgipa ja·kurangko de·na ua ku·rachakahachim indiba ian niamni a·palo ong·ani gimin anga una tangkako on·na jechakaha,” ine Jitherson Sangma parakataha.
Uni FIR ka·aoni jabri ong·pilengahaoba police-rang register ka·chipkujaenga ine janapatengon, “Ia police officer, kamtangko ka·na tangka dabiahani gimin anga uni kosako badi ka·enga. Ian niamni a·palo ong·a aro police-rangni iandakgipa kamrangara kraani ong·ja,” ine Sangma parakataha.