SHILLONG: Tura-ko Winter Capital songchina dabienggipani bidingo Meghalaya Assembly-ni Deputy Speaker Timothy D Shira-ni agangipa kattarangko YouTube social media-o taridape aganahani gimin mokordoma ka·ako man·gipa youtuber sakgniko re·baenggipa May jani 9 tariko, Shillong-o donggipa Assistant District Judge-ni court-o mikkangpaechina ge·etaniko on·ataha.
Tura-ko Winter Capital songchina dingtang dingtang dolrangni dabienggipani bidingo uni Assembly-o agananiko YouTube social media-o taridape aganaha ine matnangenba, re·anggipa March-ni 12 tariko, Assembly-ni Deputy Speaker Timothy D Shira, Assam-ni Mikkanchi R Sangma aro Garo Hills-ni Balsrang Marak-ni kosako gong kror 100-na defamation case-ko ka·ahachim.
Indake ong·engon, ia youtuber sakgniko, re·baenggipa May jani 9 tariko Assistant District Judge-ni court-o mikkangpaechina ge·etaniko on·ataha aro uamang maibakae court-ona sokbana man·jagenchimode, uamang donggijaon hearing-ko dakna nangao ga·akgen ine u·iataniko on·angaha.
Ia youtuber sakgnian an·tangtang kachario mikkangpaena nanggen, ba uamangni kosako matnanganirangna aganchakaniko on·na gita uamangni biapo mol·moltimgipako watatna nanggen ine kacharioni u·iataniko on·angaha.
Matnangako man·gipa manderang, an·tangtangni kosako matnanganirangko ku·rachaka ong·ode joljolan raiko on·anggen ineba kachari parakataha.
Tura-ko Winter Capital songchina dabianiko jegalenga ine YouTube social media-o an·tangko matnangahani gimin ia mande sakgnini kosako, Meghalaya Assembly-ni Deputy Speaker aro Resubelpara-ni NPP MLA Timothy D Shira, Shillong-o donggipa Chief Judicial Magistrate-ni kachario, ‘defamation case’ ka·angahachim.
“Assembly-o angni agananiko uamang name ma·sichenggija, anga jattangni kosako chakatenga aro Tura-ko Winter Capital songchina dabianiko jegalenga ine YouTube social media-o matnangahani gimin anga ia mande sakgnini kosako defamation case ka·aha,” ine Assembly-ni Deputy Speaker parakatahachim.
