Tura: West Garo Hills police, rim·gittanga man·gipa saksa businessman-ko naljokataha. Jekon Dadenggre PS limit-ni ning·o donggipa Danangre Songma songoniko denggu dakgipa gang ba dol rim·gitangangahachim.
Rim·gittanganga man·gipako naljokatna jotton ka·mitingo police aro rim·gitanggipa gang-ni gisepo gogrikao gang-ni sakgittamoni sakgni jokkom ong·aha. Saksako rim·na man·aha, sakgipin hospital-ona ra·angmitingo siaha.
Koborni gita duko ga·akgipa nokdangni depante Rasik Hussain, March 20 tariko Damal Asim police station-o uni pagipa Ruvi Hussain-ko Danangre Songma sepango matchuko gate salruramiting somoio u·ina man·gijagipa silchidare kebitgipa manderang rim·gitangangaha ine FIR segataha.
Indake SF 10, Dadenggre aro Damal Asim-ni police team baksa bakrime am·sandianiko a·bachengataha. March 21 tarik Sukrobar pringo Damal Asim PS-ni ning·o ga·akgipa Dipogre Asim Chiring-o rim·gitanggipa dol ba gang-ni dongnue dongani koborko man·aha. Police dolni, uamangni dongnue donggipa biapona sokangaon denggu dakgipa dolrang guli gosoaha, jena police warachake guli goskaha. Uno gang-ni sakgni jokkom ong·aha. Jokkom ong·gipa sakgnikon rim·na man·aha aro Hussain-ko naljokataha.
Duko ga·akgipako aro gogrikao jokkom ong·gipako ta·raken Dadenggre PHC-ona sanna ra·angaha ine district police chief Abraham T Sangma, koborna u·iataha.
Operation ka·ani ja·man am·sandianiko dakangkuaon police, dingtang dingtang sakkirangko man·aha. Jeon shotgun, chongipa PUma bag aro kettal donga. Rim·gitangipa dolni saksa Chingsan Marak-ko rim·aha. Sakgipin jean gogrikao jokkom ong·a bilonge siaha, uara Raksan Marak onga·chim. Saknaa bilongani gimin Dadenggre PHC-oni Tura Civil Hospital-ona ra·angmitingo ua siaha.
