SHILLONG: Licence gri silchidarerangko jakkalengani a·sel niam retiko rakkianio aro manderangna naljokaniko on·anio kenchakna nanganirang ong·enga ine Supreme Court-oni u·iatanirangko man·soahani gimin Meghalaya a·dokoba dingtang dingtang a·jani deputy commissioner-rangna, superintendent of police-rangna aro nangchakegipa sorkari department-rangna Action Plan-rang baksa a·dok sorkari, dingtangmancha Office Memorandum (OM)-ko on·angaha.
Ia Office Memorandum-o a·dokni Chief Secretary DP Wahlang-ni u·iatani gitade, ia niamrangko ra·gatanio kamrangko nirokna gita Chief Secretary-ni dilanichi dingtangmancha State Level Committee-ko songaha.
Arms Act & Rules-ni bidingo District Magistrate-rangna, Police officer-rangna aro silchidare palgiparangna u·iatna gita workshop aro awareness program-rangko ong·atjringgen ine janapatengon, licence tariani aro renew ka·anio parak ong·ani dongna gita kamrangko digital platform-ona apjitatgen aro ia kamo Home (Police) Department, Shillong-ni NIC baksa bakrimgen ine OM-o parakaha.
Licence-na dorgasto galgiparangko nipilanio sorkari, rakgipa niamrangko ra·gatgen ineba OM-o parakaha.
Silchidare tarigipa karkanarang, niamrangko ja·rikchina gita nirokna dingtangmancha ia 2025 bilsini March jaon officer-rangko seokanggen aro seoka man·gipa officer-rang, licence gnang silchidare tarienggipa karkanarangko bilsiprakon nirokanggen.
Niam gri ba licence gri silchidare tarigipa karkanarangko rim·na gita ia officer-rang, gisep gisep rang·gitik re·e nianirangkoba dakanggen ine OM-o parakaha.
Arms Act 1959-ni Section 5-ko pe·e niam gri silchidare tarigipa karkanarangko sandie chipna gita dingtangmancha am·sandianirangkoba dakanggen.
Airport aro inter-state border-rangko man·chape pilak entry point-rangon anti-smuggling team-rangko dongen aro mongsonggipa biaprango CCTV aro RFID-rangko done, nirikkianirangkoba dakgen ine OM-o parakaha.
