TURA: Tura jillao bakery ba ruti, biscuit, cake aro uandakgipa cha·anirangko tarie palenggipa dokkan aro karkanarang, rongtal an·talgija dake cha·anirangko tarie palengani gimin aro Food Safety & Standards Authority of India (FSSAI)-ni dongimin niamrangko ja·rikjaengani gimin mitam dokkan aro karkanarangko Sombar salo, A·chik Conscious Holistically Integrated Krima (ACHIK) Krima Council-ni membor-rang, chipe donataha.
Adita salrangna skangsan, ACHIK Krima Council-ni membor-rang, Tura jillao cha·ani tarie palenggipa dokkan aro karkanarangko re·e niangahachim aro uamangni am·sandianio bang·bata dokkanrangan rongtal an·talani gri cha·anirang tarie palenga aro mitamranga FSSAI-ni niamrangko ja·rikgija palenga ine nikna man·ahachim.
ACHIK Krima Council-ni parakatani gitade, mitam cha·ani tarie palgipa dokkan aro karkanarang, cha·anirangko paikanarangosa donchakrongachim aro mitamrangara FSSAI-ni dongimin niam gita cha·anirangko pack ka·anio label grisa palengani gimin ian manderangna kenchakna nangani ong·engachim.
Iandake cha·anirangko maming rongtal an·talani gri palengani gimin aro FSSAI-ni niamrangko ja·rikjaengani gimin uamang, Tura jillao donggipa adita dokkan aro karkanarangko chipataha aro ia dokkanrangni chabirangko West Garo Hills a·jani Deputy Commissioner-na pakwate on·na tik ka·angaha ineba ACHIK Krima Council-ni dilgiparang parakataha.
Indake ong·engon, cha·anirangko rongtal an·talani gri aro niamko ja·rikgija tarie palengani gimin iandakgipa dokkan aro karkanarangni kosako rakgipa ja·kurangko de·china A·chik Holistic Awakening Movement (AHAM) dolba, district administration aro bilo ong·enggipa official-rangko didiataha.
“Cha·anirangko rongtal an·talani gri tarie palenga ine adita salrangna skang dolsa CSO-ni sandie man·aniara Garo Hills-ni manderangna jagokmanpilaniko ra·baaha. Iandake cha·anirangko rongtal an·talani gri tarie palaniara manderangni an·seng baljokanio kenchakna nanganiko ra·baani ong·a. Iandakgipa kamrangara jinmani jegalgrimaniko man·na kraa aro iandakgipa manderangni kosako rakgipa ja·kurangko de·na nanga,” ine AHAM-ni president Georgeprince Momin parakataha.
