TURA: Tura-ni Babupara jolo donggipa Garo Labour Corps-ni Cenotaph-ko pe·galenba gital dake riktaina miksongengani gimin Bristibar salo Tura-ni Mothers Union, GSMC, ACHIK aro uandakgipa dingtang dingtang Civil Society Organisation (CSO)-rang, a·dokni Chief Minister Conrad K Sangma-ko uni noko grongenba chanchirimangaha.
Ia tom·anio Garo Hills-ni dingtang dingtang dolrang, Chief Minister baksa chanchirimengon, Garo Labour Corps-ni Cenotaph-ko gital dake rikpiltaianio kamrangko nirokna gita District Administration-ni songe on·gipa committee-o suk ong·nikgijaniko parakangenba, kamrangko nambate nirokna cabinet minister-ni dilanichi committee-ko songe on·china Chief Minister-ko didiangaha.
Cenotaph-ko gital dake rikpiltaianio kamrangko nirokna gita adita salrangna skangsan West Garo Hills a·jani Deputy Commissioner Jagdish Chelani, dingtangmancha committee-ko songe on·ahachim aro ia committee-ko ua an·tangan chairman ong·e dilna tik ka·enba, Tura Municipal Board (TMB)-ni official-rang, GHADC-ni membor-rang, dingtang dingtang CSO-ni dilgiparang, toromko dilgiparang, skigiparang aro A·chik dilgiparangonikoba ia committee-o membor dake seokangahachim.
Indake ong·genchimoba, Deputy Commissioner-ni songe on·gipa committee-ko Garo Hills-ni dingtang dingtang dolrang jegaltokskaenba, cabinet minister-ni dilanichi gital committee-ko songchina Chief Minister-ko didiangskaaha.
Ia tom·anio a·dokni Chief Minister, dingtang dingtang dolrangni agananirangko knatime ra·ani ja·man, uamangni nangnikani gita Garo Labour Corps-ni mikkim rasongko rakkiangkuna aro A·chikrangni ku·aganani aro daka rikanirangko namdapatna gita am·sandianirangko dakna cabinet minister-ni dilanichi committee-ko songna ku·chakaniko on·angaha.
Chief Minister-ni iandake ku·rachakaniko on·ahani gimin bang·bata dolrangan kusi ong·aniko paraktokaha.
Ia Cenotapha-ara, a·gilsak gimikni skanggipa dakgrikanio (First World War), an·tangtangko on·kange France a·songona re·anggipa pagitchamrangko gisik ra·na aro mande ra·na tarigipa cenotaph ong·achim aro bilsiantian July-ni 16 tariko Garo Hills-ni manderang, ia biapo jinma tom·enba, pagitchamrangko gisik ra·e mande ra·pilskaaniko dakrongengachim.
