TURA: Batanggimin 2012 bilsio, North Garo Hills a·jani Resubelpara Higher Secondary School-ni skigipa saksako so·ote galanina police-rang, Garo National Liberation Army (GNLA) bobil dolni gitcham area commander saksako rim·aha ine u·iataha.
“2012 bilsio Resubelpara Higher Secondary School-ni skigipa Denybirth G Momin sagiko, uni nokdangni mikkango so·ote galahani gimin GNLA Northern Zone-ni gitcham area commander Laben Ch Sangma (Chenang)-ko rim·aha,” ine saksa police officer parakataha.
Police officer-rangni u·iatani gitade, ia a·selni bidingo 2012 bilsion Mendipathar police station-o FIR ka·ahachim.
“FIR-o janapani gitade, 2012 bilsini July 19 tariko, GNLA-ni area commander Laben Sangma-ko man·chape gimik sakbri ba sakbonga manderang, Resu Mepan A·bri songona re·ange, bilsi 23 ong·gipa Denybirth Momin-ko police-rangna kobor on·timgipa ine matnangenba, uni nok a·palo donggipa footpath sambao goe galaha,” ine police officer parakataha.
Ia mandeko so·otgipa biaponiko AK guli bikrok, 9mm gulini bikrok ge·gni aro ia mandeko so·ota ine GNLA area commander-ni a·kange soi ka·gipa chittiko man·aha ineba police officer u·iataha.
2012 bilsirango GNLA bobil dol, Garo Hills gimikon mande so·otani, mande rim·gittangani, tangka dabie ra·ani aro uandakgipa kamrangko ka·e so·sojengjeng ong·atrongachim. Indake ong·genchimoba, 2018 bilsio, GNLA bobil dolni commander-in-chief Sohan D Shira-ko police-rang so·otgalna man·ani ja·man, bobil dolni pilak manderangan bame on·tokaha aro untalan Garo Hills-o tom·tomaniko man·piltaiaha.