WILLIAMNAGAR: Sukrobar salo, East Garo Hills a·jani District Education Office, National Science Day-ko maniani bak gita ‘Science & Technology For a Sustainable Future’ ine pangchakaniko donenba salsana District Level Science, Mathematics aro Environment Exhibition-ko Williamnagar-ni DRDA Hall-o ong·atangaha.
Ia Exhibition-ko ong·atanio, East Garo Hills a·jani Additional Deputy Commissioner DA Sangma, mongsonggipa sokgipa ong·e bak ra·angaha aro ia program-ko ong·atanio dingtang dingtang skulni principal-rang, skigiparang aro chatro chatrirangba bak ra·angtokaha.
Ia District Level Science, Mathematics aro Environment Exhibition-ko ong·atanio East Garo Hills a·ja gimikoni dam 12 skulrang bak ra·angtokaha aro ia dam 12 skulrangoni damchetde jillarangoni aro dambride songadam nokadamrangoni ong·a.
Ia Exhibition-o skulni chatro chatrirang, an·tangtangni skie ra·ani gita dingtang dingtang model-rangko dakmesokangtokaha.
Ia Exhibition-ko ong·atanio, East Garo Hills-ni ADC DA Sangma, program-o bak ra·giparangna aganprakangengon, bi·sarangni gisiko a·gilsakni gita u·ie ra·ani aro skie ra·anirangko iandakgipa exhibition-rangko ong·atanichi mikkangchi science baksa dal·roroatna dakchakani ong·gen aro uamangna skie on·anio uamangko gisik nangatgipa ong·gen ine parakataha.
Iandakgipa exhibition-rangko ong·atanichisa bi·sarangni science-ni bidingo baditana u·ia uko nikna aro ma·sina man·a ineba ua aganaha.