SHILLONG: Khasi aro Jaintia Hills a·jarangona rel gari ra·baaniko dingtang dingtang dolrang raken jegalsotokengon, Jaintia Hills-o rel ramarangko tarina gita da·o dipet No Objection Cerificate (NOC)-ko on·na dongkuja ine Jaintia Hills Autonomous District Council (JHADC)-ni Chief Executive Membor (CEM) Thombor Shiwat parakataha.
JHADC-ni budget session-o Voice of the People’s Party (VPP)-ni MDC Deivipaya T Tongper-ni sing·anirangna aganchakaniko on·angengon, da·o dipet Jaintia Hills a·jao rel ramarangko tarina uamang dorgastorangko man·soaba dongkuja aro NOC-ba on·na dongkuja ine Shiwat parakataha.
Adita salrangna skangsan Northeast Railway Frontier (NFR), Chaparmukh-oni Jowai-ona rel ramarangko taribaani bidingo chanchianirang ong·katahachim indiba a·doko niam gri napsrukanirangko champengna gita Inner Line Permit (ILP)-ko ra·gatchenggijade rel garirangko ra·bana man·jawa ine dingtang dingtang dolrang jegaltokahani gimin ia chanchianiko donpilaiahachim.
NFR-ni ra·bana miksonggipa kilometer 180-ni rel project-ara Assam a·dokni Chaparmukh bibraoni Meghalaya a·dokni Jowai-ona rel ramachi nangdimeatna miksonggipa project ong·achim aro ia rel ramako tarina man·genchimode ian a·dok damgnini gisepo re·a doanirangko altubatatgnokchim.
Indake ong·genchimoba, a·dokona niam gri napsrukanirang batrorognok ine dingtang dingtang dolrang jegaltokahani gimin ia project-na JHADC-ba NOC-ko on·na jechakaha.