TURA: Samagre Shiksha-ni ning·o, Education Department-ni a·bachengatgipa program ‘School Programmes in Articulation, Resilience & Kindness’ (SPARK) Summit 2025-ko Sukrobar salo, Tura-ni District Auditorium-o ong·atangaha aro ia program-ko ong·atanio, Meghalaya a·dokni Chief Minister Conrad K Sangma, Education Department-ni Advisor HM Shangpliang, Education department-ni Secretary aro State Project Director Swapnil Tembe, West Garo Hills a·jani Deputy Commissioner Jagdish Chelani, dingtang dingtang official-rang, dingtang dingtang skulni principal-rang, chatro chatrirang aro gipinrangba bak ra·angtokaha.
Ia program-ko ong·atanio a·dokni Chief Minister Conrad Sangma, tom·anio bak ra·giparangna aganprakangengon, lekka porako on·ani mongsonggipa miksonganiara, bida budiko on·nasan ong·aigija chatro chatrirangna ka·donganiko, changa sapanirangko aro janggi tangani cholrangko on·na miksonganiba ong·a ine parakataha.
Ia SPARK program-ko a·bachengataniara, ramram dake agangrikani, altugipa kamrangko skie on·ani, namgipa chanchianirangchi aro ka·sae mesokanichi chadamberangni gisikrangko dingtangatna man·aniko mesokaha ineba Sangma aganaha.
“Ia sal somoirango, agangrikna changani, jinmao aganprakna changani, ka·sae mesokani aro namgipa dakbewalrangara, lekka pora donggipa gitan apsan dake gamchatgipa ong·a aro ia SPARK program-ba chatro chatrirangko, mikkangchi uamangni neng·nikanirangko mikkangpae namatna man·na gita tarienga,” ine Chief Minister aganaha.
Ia SPARK program-ko ra·gatanichi, West Garo Hills a·jani dingtang dingtang skulrango, chatro chatrirangni dakbewal, ka·dongani aro poraianirango dingtanganiko ra·bana dakchakaha ineba Sangma parakataha.
Lekka porani gadangko tang·doatna sorkari rakbee kamrangko ka·enga ine janapatskaengon, mikkangchiba lekka porako on·anio olgrokanirangko namdapatna aro chatro chatrirangko mande ong·atna kam ka·anio SPARK gita dakgipa program-rangna sorkari, pilak nanga dakchakanirangko on·angkugen ine Chief Minister, ku·rachakaniko on·angaha.
Ia program-ko chu·sokgipa ong·atna an·tangtangko on·kange kam ka·engani gimin ua skigiparangko aro dingtang dingtang skulni dilgiparangkoba mittelpilangaha.
Dakmesokani gnang chatro chatrirangko re·dilchina skigiparangko didiangengon, chatro chatrirangkoba pangnan ka·sae dakani, kakket ong·ani aro bamgipa ong·ani gunko rakkichina Chief Minister, agan-ku·pattianirangko on·angaha.
Ia program-ko ong·atanio, Education Department-ni Advisor HM Shangpliang-ba jinmana aganprakengon, SPARK program-ko chu·sokgipa ong·atna an·tangtangko on·kange kamrangko ka·engani gimin skigiparangko aro chatro chatrirangko mittelpilangaha.
Iana skang, Education Department-ni Secretary aro State Project Director Swapnil Tembe, SPARK Outcomes Report-ko on·angenba, ia program-ni ning·o chu·sokanirangko jinmana agan-talate on·angskaaha.
SPARK program-ni ning·o dilanina aro chu·sokanirangna dingtang dingtang skulni principal-rang, skigiparang aro chatro chatrirangna Chief Minister-ni jakchi tablet-rangko on·e mande ra·pilskaanikoba dakangaha.
Ia program-ko ong·atanio, Dadenggre Puri Govt Higher Secondary School aro Tura Govt Girls Higher Secondary School-ni chatro chatrirang, chrok mesaani aro dakmesokanirangchi manderangko an·saoatangaha.