WILLIAMNAGAR: A·gilsakni gipin biaprango gitan East Garo Hills a·jaoba World Tuberculosis (TB) Day-ko Sukrobar salo, Williamnagar-ni DRDA Hall I-o maniangaha.
Ia program-ko East Garo Hills a·jani District TB Office ong·atangaha aro ia program-o East Garo Hills a·jani Additional Deputy Commissioner (ADC) Ripamchi N Sangma, mongsonggipa sokgipa ong·e bak ra·angaha.
Ia tom·anio East Garo Hills-ni ADC, jinmana aganprakengon, a·doko TB saaniko bon·atna dingtang dingtang ja·kurangko de·engani gimin Health department-ko mittelpilangenba, East Garo Hills a·jao TB saaniko bon·atna rakbee kamrangko ka·engani gimin dingtang dingtang health official-rangko, ASHA worker-rangko, Anganwadi worker-rangko aro kamo bak ong·enggipa pilakkon mittelpilangaha.
Ia program-ko ong·atani bidingo, East Garo Hills-ni District Tuberculosis Officer Dr Chrissie Pearly M Sangma, jinmana agan-talate on·angaha aro ia tom·anio dongpae jinmana aganprakanggipa gipin manderangara, District Medical & Health Officer Dr CEN Sangma, DRTB-Coordinator Mecyah Momin aro gipinrang ong·a.
Ia World TB Day-ko maniani bak gita inter-school quiz competition-koba ong·atangaha aro ia salo TB saenggipa manderangna dingtangmancha cha·ani bosturangkoba suale on·angaha.
