SHILLONG: Meghalaya Legislative Assembly-o Inner Line Permit (ILP)-na resolution-ko ra·aniara manderangni nangnikaniko chu·sokatna ja·ku de·aniko mesokanian ong·a ine a·dok sorkari parakatenba, da·o ILP-ko chu·sokataniara ma·mong sorkarini jakosa ong·ahani gimin iako chu·sokgipa ong·atna krenge kamko ka·asan ong·aigija ma·mong sorkarini nangnikanirangkoba pilakan nangrime chu·sokatna nangenga ine aganaha.
ILP-ko on·anide ma·mong sorkarini jakosa ong·aijok ine janapatengon, “Meghalaya a·dokni bang·bata biaprangan Sixth Schedule-ni ning·o ga·akgipa biaprangsa ong·ani gimin a·arangko jakkalanio dongimin niamrang donga aro iano pangchake ma·mong sorkari, ILP-ko on·anio neng·nikanirang dongkuenga,” ine a·dokni Cabinet Minister aro MDA-ni ku·wattimgipa Paul Lyngdoh aganaha.
“Meghalaya a·dokara salgro salaram jolo donggipa adita a·dokrangona nappake re·na nanggipa a·dok ong·ani gimin Meghalaya gita a·songni gipin biaprangona re·ruraenggipa manderangko champenganio neng·nikanirangko chagrongna nangnaba gnang ine kenchakanirangba dongenga,” ineba ua aganaha.
ILP-ko dabianio ma·mong sorkari baksa agangrikna gisiko nangjaenga ine dingtang dingtang dolrangni a·dok sorkariko matnangengani gimin ia kattarangko MDA-ni ku·wattimgipa Lyngdoh aganaha.
“Dilgiparangni ja·ku de·anio neng·nikanirangko namatgipasa ong·na nanggen. Ia dabianiara sorkarini nangnikanisan ong·aija indiba Assembly-o resolution-ko ra·anichi mesokaniba ong·aha. Ian Meghalaya a·doko songdongenggipa manderangni nangnikaniko chu·sokatna ja·ku de·aniba ong·aha maina Assembly-ni sak 60 MLA-rangara, a·dok gimikni seoke watatgipa dilgiparangan ong·a,” ine Lyngdoh aganaha.
“Indake ong·genchimoba ILP-ko on·anide ma·mong sorkarini jakosajok aro an·ching ma·mong sorkariko didianio nambate kamrangko ka·na nangkuenga. Unbaksana ma·mong sorkarini kenchakanirangko namatna gitaba kamko ka·na nangenga,” ineba Lyngdoh aganaha.