SHILLONG: PA Sangma sagi, jatrangni gisepo mikkang niteanichi salgro salaram a·dokrangko bak dakna jotton ka·a ine Manipur a·dokni gitcham Chief Minister aro BJP-ni saksa dilgipa N Biren Singh-ni X social media-o post ka·atani ja·man, gitcham Union Minister aro Lok Sabha-ni gitcham Speaker Purno A Sangma, salgro salaramni manderangna pangnan dakgrikgipasa ong·achim ine uni depante aro Meghalaya Chief Minister Conrad K Sangma aganchakaniko on·atskaaha.
“PA Sangma sagini bimingko ong·gija dake N Biren Singh-ni ra·aniara namen kragijani ong·aha, maina PA Sangma sagide salgro salaram a·dokrango songdongenggipa manderangna ku·rang on·gipa aro pangnan manderangni bilko warachakna jotton ka·gipasa ong·achim. Iandakmiting somoio pilakan Manipur a·doko ong·enggipa obostarangko namatnasa kamko ka·na nangenga indiba iandake saksa sakgipinko matnanggrike dongani somoi ong·ja,” ine N Biren Singh-ni PA Sangma-ko matnange social media-o seatani gimin a·dokni Chief Minister Conrad K Sangma parakatskaaha.
“An·ching pilakan nangrime kamko ka·na nangenga aro Manipur a·doko songdongenggipa manderangni namgnina kamko ka·china anga pilakkon mol·molenga. Iakosa PA Sangma sagi nangnikgenchim,” ine Conrad parakataha.
Conrad Sangma-ara PA Sangma sagini depante aro National People’s Party (NPP)-ni national president ong·a aro ia party-an Meghalaya-o MDA sorkariko dilenggipa ong·a. Manipur aro salgro salaramni gipin a·dokrangoba NPP-ni adita sak MLA-rang donga.
Iana skang, Manipur a·dokni gitcham Chief Minister N Biren Singh, PA Sangma-ni kosako matnange social media-o seatenba, ua salgro sakaram a·dokrangko bak dakna ku·rang on·aha ine matnangahachim.
“Changsao PA Sangma sagi, jatrango pangchake, salgro salaram jolko chonchongipa a·dokrangona pe·na gita ku·rang on·ahachim aro ian an·chingni a·songo ku·mong nangrimanina kenchakna nangani ong·a. Da·alo an·ching apsan daken Manipur-o ong·enggipa obostarangko nikenga,” ine Biren Singh, X social media-o Lok Sabha-ni gitcham Speaker PA Sangma-ko matnange seatahachim.
