BAGHMARA: South Garo Hills a·jao District Selection Committee (DSC)-ni gita dingtang dingtang kamrangna ong·atenggipa porikka, Meghalaya Public Service Commission (MPSC)-ni ong·atenggipa porikka baksa apsan salon ga·akengani gimin DSC porikkani tarikko ra·dona South Garo Hills a·jani Deputy Commissioner ku·rachakaniko on·ataha.
Koborko on·ani gitade, South Garo Hills a·jao DSC-ni porikkako Forester, Soil & Water Conservation Demonstrator, Sericulture Demonstrator, aro Weaving Demonstrator-ni kamrangna, April-ni 12 tariko ong·atna tik ka·manahachim indiba ia apsan salon MPSC-ni porikkakoba ong·atengani gimin porikkako sena nangenggipa candidate-rang, neng·nikanirangko man·gen ine nikenba, candidate-rangni pal saksa Grikjang S Sangma, Deputy Commissioner-ko grongenba, DSC porikkako ra·doatchina mol·moleaha.
Uni mol·molani gitan ja·mano DSC-ni porikkako April 12 tarikoniko April 19 tarikona ra·doatskaaha ine South Garo Hills a·jani Deputy Commissioner u·iataniko on·ataha.
DSC porikkani tarikko ra·doatahani gimin DSC porikkao sena sienggipa candidate-rangba, Deputy Commissioner-ko mittelpilangaha.
