RESUBELPARA: North Garo Hills a·jani ning·o deficit aro adhoc skigiparangko man·chape, sorkarini kamko ka·enggipa je manderangan, NFSA 2013-ni PHH aro AAY (Ration) card-rangko jakkalengachim, uandakgipa manderangni jakkalenggipa card-rangko a·jao cholgri ong·batgipa manderangna on·skana man·na gita ration card-rangko on·pilchina, North Garo Hills a·jani Deputy Commissioner (Supply), nangchakegipa official-rangna ge·etaniko on·angaha.
DC (Supply)-ni parakatani gitade, NFSA 2013-ni ning·o PHH aro AYY card-rangkoa songsalo cholgri ong·gipa nokdangrangnasa miksonge ra·gatahachim aro ia card-rangko sorkario kam ka·e professional tax aro uandakgipa gipin kajinarangko gamenggipa nokdangrangde man·ani ong·jachim.
2011 bilsini Socio Economic Caste Census-o pangchakesa Ration card-rangko NFSA-ni namgnirangko man·enggipa manderangna sualaha ine janapatengon, 2011 bilsioni da·o bilsi 14 batangahani gimin bang·a manderangan da·o sorkarini kamrangko man·tokaha ine Deputy Commissioner parakataha.
Ration card donge sorkario kam ka·enggipa pilak manderangkon April 30 tarikni gisepon, an·tangtangni ration card-rangko on·pilchina u·iatengon, ration card donge sorkario kam ka·enggipa manderangni bimingrangko segatengaha aro ia u·iataniko ja·rikjagenchimode niamo pangchake nanga gita ja·kurangko de·anggen ine DC (Supply) mikrakataniko on·angaha.
Indake ong·engon, NFSA (AAY/PHH)-ni ning·o namgnirangko man·enggipa pilak manderangkoba e-KYC-ni niamrangko matchotatchina Deputy Commissioner (Supply) ge·etaniko on·ataha aro e-KYC-ni kamrangko chu·gimik matchotatna man·na gita an·tangtangni Fair Price Shop centre-rangko salantian kulie donchina gita wholesaler-rang aro FPS dealer-rangnaba ge·etaniko on·ataha.
