SHILLONG: Meghalaya Board Of School Education-ni seatgipa Secondary School Leaving Certificate (SSLC) 2025 bilsini Class( X) Matric result-ko Sonibar pring 11 bajio parakataha. Ia bilsini SSLC result-ko parakatanio ge 341 school-rang 100 percent ong·e chu·sokgipa ong·a aro Meghalaya gimiko 87.10% ona sokdoe Meghalaya a·doko skanggipa changna education-ni a·bao chu·sokaniko nikna man·aha. Batanggimin bilsirangode SSLC result-ko May ba June jarangni giseposa parakatrongachim ia bilside MBOSE-ni krenge kam ka·anichi jagni gapsrangkujaon SSLC result-ko parakataha. Batanggimin bilsirangni pass percentage-ko niatgenchim ong·ode ia bilsini passed percentage rang·san tang·doaniara aio inmanpilani ong·aha, jedake 2024-ni pass percentage 55.80 percent, 2023-o 51.93 percent, 2022 bilsio 56.96 aro 2021 bilsio 52.90 percent indake 50 percent-ni ning·on ong·aiachim.
Ia bilsini SSLC porikako Meghalaya a·dokni gimik sak hajal 63,682 chatro chatrirang segiparangoni sak hajal 55,473 chatro chatrirang chu·sokaha. Unoni me·asarang sak 22,726 aro me·chikrang sak 32, 747 donga. Ia chu·sokanio songadamrangoni aro jilaniba apsan biaprangko man·angtokaha. Indake ong·engon ia bilsini SSLC result-o St. Margaret Higher Secondary Shillong-ni chatri Leisha Agarwal aro Liberty Higher Secondary School Jowai-ni Avila Kathrene P Lyngdoh Meghalaya a·dok gimiko skanggipa biapko man·e niksenggipa ong·angaha.
Garo Hills gimik district ge·bongaoni South Garo Hills chu·gimik 88.32 percentage-ko man·e kosakbatgipa gadongo ong·e nambatgipa ong·skaaha. Gnigipao West Garo Hills- 80.50%, East Garo Hills -80.31%, North Garo Hills -75.76% aro South West Garo Hills -74.77% pass percentage-ko man·aha. Garo Hills-ni Top 20-o nakatgipa gimik sak 18 donga uarangara, 2nd position-ko man·gipa Pori Panday JNHSS, Phulbari, 5-gipa biapko man·gipa Esther DShira, Sherwood School Tura, 6-gipa Ian Dongkam M Marak, Casarina Public School, Tura, aro Bathseba Ch Sangma St Xavier’s School Tura, 8-gipao Trishita Koch-Embi Rosbud, Algaro Thardy M Marak-St Josep’s Sec. School Dalu, aro Musa Kazi-JHSS, 9-gipa Abu Towfique Elhahi Mandal- JNHSS, 12-gipa Sreyan Sarker- Sherwood School, Umalizie D Sangma-Loyala Secondary School, 13-gipa Aritra Paul aro Pranjal Mishra-Sherwood School, 16-gipa Afchica Viesa D Marak-Aeroville School aro Ankit Manal-Sherwood School, 17-gipa Trivayan Hajong-Sherwood School aro Aganchi K Sangma-GYSS, 19-gipa Rehan Mahammed-JNHSS.
Ia changba SSLC porika seanio chu·sokgijagiparangna dingtangmancha April ba May jarangni gisepo Suplementary porikako ong·atgen ine Meghalaya Board Of School Education (MBOSE)-ni Examination Controller T R Lalo u·iatangaha. Indake ong·engon somoi ba tarikrangko ja·mano u·iatgen.
