New Khantolguri songni reserve-ko University-na on·ani bidingo A·king Nokma talata

Resubelpara: Sonibar salni bako, New Khantolguri  songni biga 455 ong·gipa songni Reserve-ko, Ganshyam Bora University-ko rikna Nokma palaha inani gimin, North Garo Hills a·jani Mongpanggro songni Nokmani sarao, North Garo Hills Nokma Association-ni gita jinma tom·aniko ong·atenba, New Khantolguri songni Nokma, sordar aro unbaksana songni Secretary, aro Nokmani chra depanterangba ia tom·anio dongpae bak ra·angtokaha. Tom·anio sing·sandianiko dakanio, New Khantolguri songni Nokma aganchakenba, ‘chinga a·akode palja indiba Khantolguri songni manderangna Nursery-oni degree -ona free education, free checkup-ko on·gen aro unbaksana 10% job reservation-ko poraiani gadangni kri kamrangkoba ka·na chol on·gen ine ku·chakani giminsa, ua biapko on·aha ine, New Khantolguri songni Nokma Mojindro Momin aro songni sordar ba parakaha. Battanggimin salrango, University-ko skanggipade Resu bakraosa rikna am·achim indiba biaprang chu·ongjani a·selo gipin sepangjolrangni biaprangoba rikna mangsongaha indiba bisongni nangnika gita biaprang chu·ongjani gimin ja·mano Resubelpara constituency-ni Development Committee-ni Secretary, New Khantolguri songni A·king Nokma-ni biapo rikna mangsonge songni manderang baksa chanchirimaniko dakenba agreement-o pangchake ua biapko on·a gita nangnikaha aro ua Reserve-ko council-ni niamo gita bilsichikkung prakon renew ka·naba tik ka·e ra·aha. University-ko a·bachengatani ja·mano dedrang sudrangrangna neng·nikani dongama dongjawa ine sing·anina aganchakengon, iani giminde agreement-o ra·napkuja aro kosako janapbagimin gita bilsi chikkung prako renew ka·na nanga ingipao pangchake ra·galaniko dakgen aro University-ko a·bachengatna, tom·bimonganiko ong·ataoni bilsi gittam-ni gisepo kam ka·jagenchimode Reserve-ko Aking Nokma ra·pilgen aro uko songnan pakwatpilaigen ineba A·king Nokma aganaha, indiba iako ra·baanichi songni manderangna namgni ong·genchimode bilsi ritchaba chalaiangaichina ine parakatenba, agreement-koba Magistrate aro Deputy Commissioner baksasa soi ka·grikgen ineba songni sordar talatanganiko onangaha.