POSHAN-ni cook, helper-rang dormaha bariatchina dabia

Shillong: Meghalaya-o PM Poshan scheme-ni Cook-cum Helpers Union, ia jani gisepon ma·mong sorkari uamangni dormahako bariatnaba donga ine ka·dongenga.
Union, uamangni president Gina Nengnong-ni dilanio meja Sukrobar salo Education Department-ni Secretary aro PM POSHAN-ni Project Director Swapnil Tembe-ko uni office chamber-o grongaha.
Project Director-ko grongaon, Union, uamangni ru·uta somoirangoni dabianiko gisik ra·attaiaha. Ma·mong sorkarini share-o man·gipa jaanti gong 900-ko bariatna Union, Prime Minister Narendra Modi aro Union Education Minister Dharmendra Pradhan-na lekkako on·ataha.
Indake ong·engon Tembe, delegation-na ia mamlako kosakona ra·angna ka·dongataha.
Jeko knaani ja·man Nengnong, uamangni dabianiko ia jaon chu·sokatnaba donga  ine ka·donganiko parakaha. Unbaksana Chief Minister Conrad K Sangma-ko ia mamlako nirokatchina mol·molaha.
Tom·anio union-ni adviser Khroo L Pariat, Vice president JA Suting aro uamamgni genereal secratary C Shongwan-mangba bakko ra·aha.