SHILLONG: Meghalaya a·doko Anganwadi worker aro Anganwadi helper dake kam ka·enggiparangna dormaharangko bariatchina dabie Meghalaya Anganwadi Workers & Helpers Union (MAWHU), a·dok sorkarina sedoataha.
Iani bidingo a·dokni Social Welfare Minister Paul Lyngdoh-na sedoatengon, Anganwadi worker-rangna dormahako gong 26,000-ona aro Anganwadi helper-rangni dormahako gong 21,000-ona bariatchina MAWHU-ni general secretary Diangtima Lyngdoh didiataha.
Ia sal somoirango manderangni nangchongmotgipa bosturang dam rakbatengaha ine MAWHU, Anganwadirangnaba dormaharangko bariatchina a·dok sorkariko didiataha.
Maharashtra aro uandakgipa gipin a·dokrangode, siani ba kamoni neng·takani somoi ong·ahaon Anganwadi-rangna gong lak 1 aro Anganwadi helper-rangna gong 75,000 ka·e tangkarangko man·enga ineba MAWHU, Meghalaya a·dokoba apsan daken siani ba kamoni neng·takani somoi ong·ahaon Anganwadi worker aro helper-rangna one-time financial assistance ba changsano tangka paisani gita dakchakanirangko on·china a·dok sorkariko didiataha.
Adita salrangna skang a·dok sorkarini parakatgipa Meghalaya Social Welfare Recruitment Board-o komibeoba MAHWU-ni membor sakgniko rimnapchina gitaba Lyngdoh didiataha.
Poshan Tracker App-o update ka·na nangenggipa Face Recognition System aro eKYC-ni a·sel Anganwadirang neng·nikanirangko chagrongna nangtokenga ine janapatengon, “FRS aro e-KYC-ko dakanichi kamrang jakchakjabata gita ong·engani gimin Anganwadirangko ianoniko watchina chinga mol·molenga,” ine MAHWU-ni general secretary, a·dok sorkari aro ma·mong sorkariko mol·molataha.
