SHILLONG: Ia bilsini Secondary School Leaving Certificate (SSLC) porikkani result-ni bidingo dingtang dingtang dolrangni matnanganirangna a·dokni Chief Minister Conrad K Sangma, mamingkoba aganna gita jechakahaoba, ia bilsini SSLC result-ara uni Chief Minister ong·engmitingo nambatsranggipa bitean ong·aha ine parakatskaaha.
CM Impact guidebook-ni bidingo aro rang·san a·doko result-rang nambatangahani gimin mitam dolrangni jajrengchakanirangna aganchakaniko on·angengon, porikkani result-rangko namdapatna ja·ku de·ani, mongsongbate songadam nokamdamrango chatro chatrirang, porikkarangna tarisoanio neng·nikanirangko chagrongna nangrongani gimin iandakgipa neng·nikanirangko namatanian sorkarini mongsonggipa kam ong·aha ine Sangma aganaha.
“Indita bilsirangna SSLC porikkani result-rang namdapatna man·jaengani giminan anga suk ong·jaengachim. Namdapataniko lower primary gadangonin nangengachim aro iani giminsa chu·sokna man·jabatenggipa a·jarango skigiparangna training-rangko aro chatro chatrirangna nambata cholrangko on·na miksongaha,” ine Chief Minister aganaha.
CM Impact Guidebook-rangko matnangengani gimin aganchakaniko on·angengon, ian Civil Service, IIT, IIM, NEET aro GMAT gita dakgipa susagrikani porikkarango gitan chatro chatrirangna gitcham question-rangoniko poraina cholrangko on·ani gitasan ong·aia ine Chief Minister parakataha.
“Chatro chatrirang, question-rangko nambate ma·sichina gita chingha question format-rangko chatro chatrirangna on·na tik ka·aha,” ine Sangma talataniko on·angaha.
Sangma-ni aganani gitade, batanggimin bilsisni ba bilsichetni gisepo ian uni nambatsranggipa result-ko nikani ong·aha ine ua, an·tangni jikgipa aro ripengskarangnaba aganaha.
“Chatro saksa class 10-o fail ong·aniko chanchiate nibo, ian uamangni jumangni bon·ani a·bachengani ong·genchim aro ian angko pangnan suk ong·atrongja,” ine ua aganaha.
Ia bilsini result-ko matnangenggiparangna aganchakaniko on·angengon, “Manderang jekoba ong·gija aganchina angade uarangna maming aganchakani dongjawa. Anga an·tangde skulo poraienggipa bi·sani gitasa niate kamko ka·aha aro anga kusi ong·a da·alo dingtanganiko nikna man·aha,” ine Chief Minister aganaha.
Ia guidebook-rangara chatro chatrirangko porikkana tarisamsona dakchakgipasan ong·aia ine janapatengon, “Ia booklet-rang uamangko IAS officer-rangde ong·atjawa aro uamang rakbate poraina nangkugen. Ia booklet-rang dongaiani gimin chatro chatrirang gimikkon man·aigen ia katta ong·ja,” ine Sangma talataniko on·angaha.
Higher Secondary section-rangko nangdapengani gimin janapatskaengon, bang·bata course-rangko a·bachengatna gita sorkari, dingtang dingtang sorkari skul, private skul aro sorkarini dakchake on·enggipa skulrang baksa chanchirimanaha ine Chief Minister parakataha.