SHILLONG: Dingtang dingtang kamrangna aro scheme-rangko ra·na gita Aadhar link ka·na nangengani gimin dingtang dingtang dolrang jegaltokengon, ia ge·etanide a·dok sorkarioni ong·ja indiba ma·mong sorkarini ge·etanisa ine Budbar salo, a·dokni Cabinet Minister aro MDA sorkarini ku·wattimgipa Ampareen Lyngdoh parakataha.
Dingtang dingtang sorkarini scheme-rangko ra·na gita Aadhar-ko link ka·na nangengani gimin a·dok sorkarikode matnangna man·jawa ineba ua aganaha.
Aadhar link ka·na nanganiko jegale Budbar salo, Awaken India Movement (AIM) minggipa dolni jingjengatanina aganchakaniko on·angengon, “Manderangni namgnina ra·gate on·gipa scheme-rangko ra·na gita Aadhar link ka·na nanganiko jegale badiaba badiaba dolrang re·jomaniko ong·ataha ine Deputy Commissioner angna talataniko on·aha. Indiba iani bidingo MDA-I ba MDA-2 sorkari ba badiaba political party-kode matnanganide niam gita ong·jaenga. Aadhar-de Parliament-o Bill-ko ra·bae aro Parliament-o niam tarigiminsa ong·a aro iani bidingo Meghalaya sorkaride mamingkoba dakna man·ja,” ine Lyngdoh aganaha.
Meghalaya a·dokko Aadhar-oniko watchina gita a·dok sorkari, 2016-17 bilsirangon ma·mong sorkarina sedoatahachim ine janapatengon, “Iani bidingo India sorkari mamingkoba aganchakjaha aro ja·mano manderangni namgnina ra·gatgipa dingtang dingtang scheme-rang, jekai ration card, job card aro da·o MHIS aro uandakgipa scheme-rangko ra·naba Aadhar-ko link ka·na nangaha ine ma·sina man·aha,” ine a·dokni Cabinet Minister parakataha.
Aadhar link ka·aniko MDA sorkarisa a·bachengataha ine agananide kakket ong·ja ine talataniko on·angengon, “Aadhar link ka·na nanganiko niatgenchimode manderang scheme-rangko nangnikja ong·ode Aadhar link ka·gijaba dongna man·aia indiba ration card ba MHIS card-rangko nangnikgenchimode na·simango Aadhar dongskana nanggen. Scholarship-na dorgasto galenggipa chatro chatrirangba Aadhar dongna nanggen. Uni gimin ia Aadhar-ko India sorkari, a·songo songdongenggipa manderangna mingsa sakki dakesa ra·gataha,” ine Lyngdoh aganaha.
Aadhar-ni bidingo jegalna nanganirang donggenchimode nangchakegipa official-rangna seachi badi ka·china gitaba ua jegalenggipa dolrangko didiataha.