TURA: Dal·brobaenggipa chadamberangni janggi tanganio dingtanganiko ra·bana man·na gita skigiparangna dingtangmancha uamangni skie on·aniko namdapatna miksonganio Training program-ko April 9 tarikoni 11 tarikona Tura-ni Government Girls Higher Secondary School-o ong·atenga.
Ia training program-ko Shillong-o donggipa Meghalaya Institute of Governance (MIG) ong·atenga.
Ia training program-ko a·bachengatanio, MIG-ni State Coordinator aro ia program-o skie on·enggipa June Warbah, jinmana aganprakangengon, a·doko Meghalaya Institute of Governance (MIG), dingtang dingtang training program-rangko ong·atenga aro ian ‘Building Young Leader Boys and Girls with Transformation life skills’ project-ni gnigipa bak ong·enga ine parakataha.
Ia project-ni skanggipa bakko bilsignina skang a·bachengataha ine janapatengon, ia project-ni skanggipa bako Garo Hills-oni dam 11 skulrango jako ra·e chu·sokgipa ong·aha aro da·o ia gnigipa bakko ong·atenga ine Warbah parakataha.
Ia salgittamna ong·atenggipa training program-o skigiparangna ka·dongani aro an·tangko mande ra·ani, sakgipinrang baksa agangrikani, meligrikgijanirangko namatna songgigrikani, an·tangtang baseani, somoi jakkalani, tangka paisarangko koros ka·anio chanchisoani, me·a aro me·chikni gisepo agangrikani, HIV aro AIDS sabisini bidingo u·iatani, agan-ku·pattiani aro uandakgipa dingtang dingtang kamrangni bidingo skie on·anggen ineba Warbah aganaha.
Ia training program-ko ong·atanio dingtang dingtang skulrangoni skigiparang bak ra·enga.
