SHILLONG: Sorkarini dingtang dingtang scheme-rangko ra·na aro kamrangna Aadhar link ka·na nangengani gimin Budbar salo, Awakening India Movement (AIM) Meghalaya unit-ni jegalangani ja·man Aadhar-na biming segatanide manderangni skaniosa ong·aia aro darangkoba iana drana man·ja ine Bristibar salo, a·dokni Cabinet Minister aro MDA 2.0 sorkarini ku·wattimgipa Paul Lyngdoh parakataha.
“Mai miksonganio Aadhar-ko jegalenga? Darangkoba Aadhar-na biming segatchinade draenga ong·ja aro iani ortode je manderangan Aadhar-na biming segatna sikjaengachim, uamangde sorkarini mitam scheme-rangko man·aniba ong·skaja. Uni gimin iade mandeni skaniosa ong·aia,” ine Lyngdoh aganaha.
Aadhar-ko jegalenggipa dolrangna aganchakaniko on·angengon, “Chinga a·bachengonin aganenga, iano jegalani maming ortoan dongjaenga. Ian Pan Card-na ba Driving Licence-na jegalani gitasan ong·aienga. Jekoba skatang jegalnade man·jawa maiba ortode dongna nanga,” ine Lyngdoh aganaha.
Aadhar tarichina ge·etanide a·dok sorkarioni ong·ja ine talataniko on·angskaengon, “Aadhar-na biming segatanikode India sorkarini dingtang dingtang Ministry-rangonisa nangtelgipa ong·atenga maina iachisa sorkarini dingtang dingtang program-rang aro scheme-rang baditana kingking chu·sokgipa ong·enga ong·jaenga, ukode ma·sina man·a,” ine Lyngdoh aganaha.
Biming segatani gride maikai mingsa scheme-o indita sak namgnirangko man·enga ine ma·sina man·gen ineba Cabinet Minister sing·doangaha.
Aadhar-na biming segataniko jegale re·anggipa Budbar salo AIM Meghalaya unit-ni membor-rang, Shillong Civil Hospital-ni mikkango donggipa U Kiang Nangbah-ni statue sambao jinma tom·aniko ong·atangahachim aro ja·mano jinma re·jomengmiting somoio police-rang baksa adita nanggrikaniba ong·katahachim.