SHILLONG: Meghalaya a·doko songdongenggipa dingtang dingtang jatrangni gisepo ku·cholsan ong·aniko ra·bana aro jatsa jatgipinni ku·sikrangko skie ra·grikna gita a·dokni Education department, pilak skulrangon Class 4-ona kingking Khasi aro Garo subject-rangko compulsory ba ra·telna nanggipa subject dake ra·gatna miksongenga.
Ia proposal-o janapani gitade, Khasi aro Jaintia ku·sikrangko agangipa chatro chatrirang, Garo ku·sikko skie ra·gen aro apsan daken Garo ku·sikko agangipa chatro chatrirangba Khasi ku·sikko skie ra·skagen. Hindi, Bengali, ba Nepali ku·sikko agangipa chatro chatrirangnade, skulni biapo pangchake, ia ku·sik minggnioni mingsako ra·na on·skagen.
Sorkarioni u·iatani gitade, National Education Policy (NEP) 2020-o bi·sarangna dingtang dingtang ku·sikrangko skie on·na nanganiko janapahani gimin iano pangchake Meghalaya a·dokni skulrangoba class 4-ona kingking Khasi aro Garo subject-rangko iandake ra·gatna tik ka·angaha.
Meghalaya a·doko Khasi, Jaintia aro Garo jatrang ku·cholsan ong·e janggi tangengani gimin iandake jatsa jatgipinni ku·sikko skie ra·grikaniara a·doko meli-nangrimaniko aro chatro chatrirangni ku·sik man·aniko bariatna dakchakani ong·gen ineba sorkarini ra·baenggipa proposal-o janapaha.
“Jatsa jatgipinni ku·sikrangko skie ra·grikanichi ian chatro chatrirangni skie ra·anikosan ong·aigija dingtang dingtang jatrangni gisepo chel·grikaniko sepangbatatna dakchakani ong·gen,” ine sorkarini proposal-o janapataha.
Iani bidingo dingtang dingtang dolrangni aro a·doko songdongenggipa manderangni ku·pattie on·anirangkoba sorkari bi·ataha aro iani bidingo ku·pattianirangko, May jani 9 tarikona kingking megeducation@yahoo.
Sorkarini ra·baenggipa niam gitade, English Medium-ni curriculum-o Class 1-oni class 4-ona chatro chatrirang, English, Khasi aro Garo-ko skie ra·gnok, Non-English medium-o chatro chatrirang, ku·siktang baksana English aro Khasi ba Garo-ko biaptangtangni kri skie ra·skagnok. Class 5-oni Class 8-onade Mother Tongue, English aro Hindi ba Khasi ba Garo-ko skie ra·anggen aro Class 9 aro 10-ode Additional English dongskajawaha indiba secondary skulo skie ra·baenga gitan Indian language mingsako skie ra·angskagen.