SHILLONG: Manderangko Aadhar-na biming segatchina gita sorkari draani katta dongja ine Sukrobar salo, a·dokni Deputy Chief Minister aro Home Minister Prestone Tynsong parakataha.
Sorkarini dingtang dingtang scheme-rangko ra·na aro kamrangna Aadhar link ka·na nangengani gimin Budbar salo, Awakening India Movement (AIM) Meghalaya unit-ni jegalanggipani giminde mamingkoba aganna gita jechakangengon, “Mitam manderang Aadhar-ko jegaltokenga ine anga nikaha aro angade iako jegalna man·ja. Uamang ma·mong ba a·dok sorkarini on·enggipa cholrangko nangnikja ong·ode uamangni skaniosa. Aadhar-na biming segataniara nanga ong·ja ine uamang nikenga ong·ode uamangko biming segatchina sorkari drana man·jawa,” ine Tynsong aganaha.
Sorkarini on·enggipa dingtang dingtang namgnirangko ra·na Aadhar-ko nanganiara gital ong·ja indiba skangonin donga ine janapatskaengon, manderang da·o an·tangtangan Aadhar-na biming segattokengaha ine Deputy Chief Minister parakataha.
“A·bachengode manderang raken Aadhar card-ko jegaltokachim indiba da·o manderang an·tangtangan Aadhar-na biming segatna gita re·batokengaha,” ine ua aganaha.
Sorkarini on·enggipa dingtang dingtang scheme-rangnasan ong·aigija skul aro college-rango admission ra·na aro sanna bananirangko ra·na gitaba Aadhar-ko nangengani giminsa da·alo manderang, Aadhar card tarina gisik nangtokengaha ineba Tynsong parakataha.
“Aadhar-na biming segatna gita darangkoba sorkari drana man·jawa indiba manderang sorkarini on·enggipa namgnirangko ra·na sikenga ong·ode biming segatnade nangaigen,” ine Deputy Chief Minister aganaha.
Aadhar-na biming segataniko jegale re·anggipa Budbar salo AIM Meghalaya unit-ni membor-rang, Shillong Civil Hospital-ni mikkango donggipa U Kiang Nangbah-ni statue sambao jinma tom·aniko ong·atangahachim aro ja·mano jinma re·jomengmiting somoio police-rang baksa adita nanggrikaniba ong·katahachim.