TURA: West Garo Hills aro South West Garo Hills a·jani a·kawe jolrango niam gri ro·ong bikotaniko dontongchina gita Niksamso Garo Community Organisation (NGCO), ro·ong bikotanio jak donggipa dingtang dingtang dolrangna mikrakataniko on·angaha.
NGCO-ni parakatani gitade, ia jolrango niam gri ro·ongrangko bikotengani a·selan samtangtango ong·telaigiparangna nangchakeaniko ra·baenga.
Ia jolrango ro·ong bikotenggipa quarry-rangko NGCO am·sandion, bang·bata quarry-rangan licence gri aro nangchongmotgipa lekkarang grisa chalaienga ine nikna man·aha.
“Ia biaprangoniko niam gri ro·ong bikotengani a·selan buring bolgrimrangni porongrong ong·aniko, a·a ruronganirangko aro chiring chibisikrangni tiproroangenganiko nikna man·enga,” ine NGCO-ni president Tengrak Marak parakataha.
Ia jolrangoniko niam gri ro·ongrangko bikote Assam aro Bangladesh a·songrangonaba salangengani a·selan ian samtangtangna nangchakeaniko ra·baan baksana a·dokna gimaani ong·enga ineba NGCO-ni president parakataha.
“Iandake niam gri ro·ongrangko bikotengani a·selan ia jolrangni nitoaniko aro samtangtangko nisigalani gitaba ong·enga. Ia jolrango donggipa bang·bea tourist spot-rangan nosto ka·ako man·tokengaha. Ia biaprango niam gri ro·ong bikotaniko dontongjagenchimode mikkangchi ian namjabata obostaona sokanggen,” ine Marak parakataha.
Marak-ni u·iatani gitade, adita salrangna skang NGCO-ni membor-rang, Garobadha jolrangona, mongsongbate Tan Gaon aro Chatibui songrangona re·ange nion, ia jolrango maming licence grisa ro·ong quarry-rangko chalaienga ine nikna man·aha.
“Ia biaprangona re·anganio chinga songni manderang baksa agangrikaha aro uamang ia biaprango ro·ongrangko bikotna permission-ko on·na jechakachim ine ma·sina man·aha. Ia biaprangoniko niam gri ro·ong bikotengani a·selan songni manderang, buring bolgrimrangni porongrong ong·anganiko nikna nangenga aro uamangni jakkalenggipa chiring chibisikrangba tiproroangengaha,” ine NGCO-ni president parakataha.
Iani bidingo a·dokni Forest department-ko matnangatengon, ia biaprango niam gri ro·ong bikotanirangko nikengoba aro jolo songdongenggipa manderangni badi ka·anirangko man·engoba, niam gri ro·ong bikotaniko champengna maming ja·kurangko de·jaenga ine NGCO parakataha.
