SHILLONG: Re·anggipa February-ni 21 tariko ong·atanggipa Jaintia Hills Autonomous District Council (JHADC) election-ko a·dok sorkari aro District Administration, manderang jakgitele pu·onna aro nama bewalo ong·atjaha ine Sombar salo, Voice of the People’s Party (VPP) matnangattaienba, iani bidingo sandirokatchina National People’s Party (NPP)-chi dilenggipa MDA sorkario dabiangaha.
Iani bidingo a·dokni Chief Secretary DP Wahlang-na sedoatengon, JHADC-ni ning·o donggipa bang·a constituency-rangon kenchakna nanggipa polling station-rang donga ine ma·sienba, election-ko name ong·atchina VPP, West Jaintia Hills aro East Jaintia Hills a·jani District Election Officer-rangko mol·molahachim indiba kenchakna nanggipa polling station-rango chel·chakgipa sipai dolrangko chu·onga gita donjahani a·sel mitam polling station-rango ong·gija dakgipa manderang chol ra·na man·aha ine VPP-ni general secretary aro Shillong-ni MP Ricky AJ Syngkon parakataha.
Ia polling station-rango chu·onga gita sipai dolrangko donjahani a·sel election official-rang, mamingkon dakna man·jaha aro uandaken pu·onanio ong·gija dakanirangko nikna man·aha ineba Syngkon parakataha.
Syngkon-ni parakatani gitade, East Jaintia Hills a·jani damgni constituency ning·o donggipa dambri polling station-rango ong·gija dakgipa manderang napdraenba, electronic voting machine (EVM)-rangko nosto ka·e galaha aro iani a·selan pu·onaniko dontongatna nangahachim.
Iani a·selsa Musniang-Rangad constituency-ni Wapungskur A aro Wapungskur B baksana Bataw-Lakadong constituency-ni Bataw A aro Bataw B polling station-rango pu·onpiltaianiko dakna nangaha ineba VPP-ni general secretary parakataha.
