Shillong: Meghalaya Sector-ni gita India-Bangladesh sima ario nitimenggipa security-rangko bilakbatatna miksonge Border Security Force (BSF) aro Border Guard Bangladesh (BGB) Sector Commander Level Coordination tom·e chanchirimaniko meja Bristibar salo Bangladesh-ni Bijoypur-o dakangaha. Ia tom·anio India chipakni Tura Sector-ni DIG Lalit Mohan Sharma aro Shillong Sector-ni DIG Manoj Kumar Barnwal, aro Bangladesh-chipakni Mymensingh Sector-ni Commander Col Sarker Mohammad Mostafizur Rahman una agreba Battalion Commander aro Staff officer-rangba dolgnichinin bak ra·angtokaha. Ia tom·anikon a·song damgnini sima arirango maming donnuagri ong·e tom·tome aro nangrimgrike dongna aro Security Force-rangko bilabatatna miksonge ong·atangaha ine BSF aganangaha.
BSF aro BGB dolgnian sima arirango niamgri badingchiwalaniko aro niamgri napsrukaniko mikangchiba name dake nitimangkuna ku·monggrikan baksana sima ario nang·chakgipa gipin kamrangni giminba chanchirimangaha aro BSF aro BGB dolgnian mikangchiba maiba neng·nikani ba gelna am·telgijagipa a·selrang ong·oba apsan bakrime kam ka·na aro pangnan tom·e chanchirimaniko dakrongna ku·mongriktokangaha.
