TURA: Tura-ko Winter Capital songchina dabienggipani bidingo manderangna talatanirangko on·na gita A·chik State People’s Front (ASPF)-ni chang chetgipa tom·bimonganiko re·anggipa Sonibar salo, North Garo Hills a·jani Sualmari High skulo ong·atangaha.
Ia tom·bimonganio, ASPF dolni general secretary Bernita R. Marak, chief organising secretary, Raksim Marak aro una agreba, ASPF-ni dingtang dingtang Unit-ni dilgiparang, Nokma sardar-rang aro songni manderangba dongpae bak ra·angaha.
Ia tom·bimonganio, ASPF-ni general secretary Bernita Marak jinmana aganprakangengon, Winter Capital-ni chong·mot miksongarangko jinmana agan-talate on·angenba, iani gamchatani aro namgnirangni giminba aganangaha. Marak-ni aganani gitade, jensalo Meghalaya, Assam a·dokoni maeke, 1972 bilsio Meghalaya Autonomous State-ko man·chengaha aro ua somoio skanggipa Assembly tom·aniko Tura-ni Garo Hills Autonomous District Council (GHADC)-osa ong·atchengaha. Indake ua tom·anio, Khasi, Jaintia aro Garo jatgittamni dilgiparang apsan ku·monge, Summer Capital-ko Shillong aro Winter Capital-ko Tura-o ong·atna tik ka·ahachim, jedakode, Meghalaya a·dok gimikon apsan namroro silroroaniko tikatna man·gen, aro ia miksonganiosa gitcham dilgiparang, Tura-ko Winter Capital dakna tik ka·aha ine Marak aganaha.
Uni gisepon, da·alonaba ia ku·rachakgiminko chu·sokate on·kujaengani giminsa, Tura-ko Winter Capital songchina dabienga ine ASPF-ni general secretary Bernita Marak talataniko on·angaha.
Da·alo Winter Capital-ko nangnikaniara, Shillong songjinmao gita pilakni gitan apsan development-ko man·pana, jekai poraienggipa chadamberangna namgipa skul aro college-rangko ra·bae on·na aro una agreba, Garo jatrangna chamgimin 40% Job Reservation Policy-ko man·a, aro dingtang dingtang gadangrango janggi tangani cholrangko man·pana miksonganio, Tura-ko Winter Capital songna nangchongmotengani gimin Garo Hill-ni dingtang dingtang songrangona re·roroe Winter Capital-na dabiani bidingo talataniko on·enga ineba Marak talatangaha.
Bon·kame, Tura-ko Winter Capital songchina dabianio, A·chik a·songo songdongenggipa sakanti manderangan iana jak on·pachina aro ku·cholsan ku·rang on·pachina ineba ASPF-ni general secretary mol·molangaha.
