SHILLONG: Development of North-Eastern Region (DoNER)-ni Union Minister Jyotiraditya Scindia-chi dilanggipa State Vision Plan-ni bidingo tom·aniko ong·atanio, Meghalaya a·dokni Chief Minister Conrad K Sangma-ba dongpae bak ra·angaha.
Tom·a matchotani ja·man social media-o post ka·atengon, Meghalaya a·doko pilakni gitan namroro silroroaniko ra·bana sorkarini ka·enggipa kamrangko a·dokni Chief Minister parakataha.
Ia tom·anio a·dokni Chief Minister, chanchirimanio bak ra·angpaengon, 2028 bilsini gisepo Meghalaya a·dokko 10 billion US Dollar Economy ong·atna nisan done ka·enggipa kamrangni bidingo talate on·angaha.
Dingtang dingtang department-rango kam ka·giparangko bilakbatatanichi, bading chiwalanirangko tang·doatanichi aro songadam nokadamrango namroro silroroaniko ra·baanichi ia miksonganiko chu·sokatna sorkari krenge kam ka·enga ine Sangma aganaha.
Union Minister-ni ku·pattiani gita, a·doko man·gipa Lakadong holdi aro dingtang dingtang biaprango homestay-rangko kulianichi aro manderangni rochakgipa biaprangko taridapanichi namroro silroroaniko tang·doatna sorkari jotton ka·gen ineba Chief Minister parakataha.
Tourism aro economy-ko tang·doatna gita rama jal·langrangko namdapatna kamrangko ka·enga ineba Sangma parakataha.
Meghalaya a·dokna pilak nanga dakchakanirangko on·engani gimin ua dingtangmancha Union DoNER Minister-koba mittelpilangaha.
